2020 jylmen salystyrǵanda 12%-ǵa artqan.
Qazaqstan Úkimeti halyqqa neǵurlym yńǵaıly jáne zamanaýı túrde qamtamasyz etý úshin memlekettik qyzmetterdi sıfrlandyrý jumysyn júrgizip jatyr. Bul týraly Eńbek jáne halyqty áleýmettik qorǵaý mınıstri Serik Shápkenov Úkimet otyrysynda aıtty, dep habarlaıdy Almaty-akshamy.kz.
Eńbekmıniniń basshysy óz sóziniń basynda áleýmettik-eńbek salasynda 45 memlekettik qyzmet kórsetiletinin atap ótti. Mınıstrlik halyqqa neǵurlym yńǵaıly jáne zamanaýı túrde qamtamasyz etý úshin olardy sıfrlandyrý boıynsha keshendi sharalar qabyldaýda.
«Ótken jyly aǵymdaǵy bıznes-prosesterge júrgizilgen taldaý nátıjesinde memlekettik qyzmetterdiń damýyn tejeıtin birqatar faktorlar anyqtaldy. Atap aıtqanda, olar - zeınetaqy men járdemaqy taǵaıyndaý úshin qajetti «tarıhı» derekterdiń bolmaýy, mobıldi azamattar bazasynda tirkeýdiń bolmaýy. Osyǵan baılanysty biz memlekettik qyzmet kórsetý úderisterin reınjınırıng jáne transformasıalaý boıynsha jumys júrgizýdemiz.
Búgingi kúni elektrondyq formatta 45 memlekettik qyzmettiń 42 túri nemese 93% usynylady, onyń ishinde 21 qyzmetti nemese 43% proaktıvti túrde alýǵa bolady.
2021 jyly áleýmettik-eńbek salasynda barlyǵy 12,6 mln memlekettik qyzmet kórsetildi, onyń ishinde 9,1 mln nemese 72% elektrondyq túrde kórsetildi. Bul 2020 jylmen salystyrǵanda 12% - ǵa artyq. 2025 jylǵa qaraı biz barlyq memlekettik qyzmetterdi 100% elektrondy formatqa kóshirýdi josparladyq», – dedi Serik Shápkenov.
Mınıstr sondaı-aq, halyqtyń qyzmet alý múmkindikterin keńeıtý maqsatynda ótken jyldyń qazan aıynda Eńbekmıni eki bankpen birlesip, olardyń platformalarynda bala týýǵa baılanysty memlekettik qyzmetter kórsetý boıynsha servısterdi iske asyrǵanyn atap ótti. Tek 2021 jyldyń tórtinshi toqsanynda balalary bar 16,5 myńnan astam otbasy úıde otyryp, EDB mobıldi qosymshalary arqyly qyzmet aldy. Osy praktıkany basqa bankterdiń mobıldi qosymshalary arqyly engizý jónindegi jumys jalǵasatyn bolady.
«Memlekettik qyzmetterdi alý rásimderin ońtaılandyrý maqsatynda 17 qyzmet túri boıynsha eksaýmaqtyq qaǵıdatyn engizildi. Iaǵnı, azamattar ornalasqan jerine qaramastan, memlekettik qyzmetti alý úshin kez kelgen halyqqa qyzmet kórsetý ortalyǵyna júgine alady. Mysaly, Nur-Sultan qalasynyń turǵyny ýaqytsha Almatyda turyp, kez kelgen halyqqa qyzmet kórsetý ortalyǵyna baryp, ózine tıesili áleýmettik tólemdi alýǵa ótinish bere alady. 2021 jyldyń tórtinshi toqsanynda 22,6 myńnan astam azamat eksaýmaqtyq qaǵıdat boıynsha qyzmet aldy.
Sondaı-aq, operasıalyq shyǵyndardy únemdeý maqsatynda biz bir azamatqa taǵaıyndalǵan birneshe áleýmettik tólemderdi bir tólemge biriktirip aýdarýdy júzege asyrdyq. Sonyń arqasynda 2021 jyldyń 7 aıynda 3 mlrd. teńge únemdedik, al jyl saıyn 6 mlrd. teńge únemdeletin bolady», – dedi Serik Shápkenov.