Bizdiń baıtaq elimizde 2016 jyldyń 1 naýryzynan bastap Alǵys aıtý kúni atap ótile bastady. Dál osy kúni Qazaqstan halqy Assambleıasy qurylǵandyqtan, merekeniń máni de, mańyzy da tereńdeı túskendeı.
Alǵys aıtý kúnin merekeleýdiń taǵy bir tıimdi tusy – «Máńgilik El» birligin ortaq tarıh jáne tarıhı sana negizinde nyǵaıtý men damytýdyń mánmátininde qazaqstandyq qundylyqtardy beıneleıdi. Osynaý jylylyqqa toly Alǵys aıtý kúni – eń aldymen elimizde tynyshtyq pen úndestik, ózara senimdilik pen barlyq qazaqstandyqtarǵa degen qurmettiń ornyǵýyna negiz bolǵan beıbitshilik pen kelisim saıasatynyń saltanatty kúni. Bul – taǵdyr tálkegimen Qazaqstan jerine eriksiz qonys aýdarǵan túrli etnostardyń mıllıondaǵan ókilderiniń qutty qonysyna aınalǵan qasıetti qazaq jeri men qonaqjaı qazaq halqyna tereń taǵzymnyń belgisi. Qazaq halqy sonaý qıyn-qystaý zamanda olardyń basyna túsken aýyrtpalyqty qaıyspaı birge kótere bilse, bul búgingi tańda elimizdegi túrli ult ókilderiniń arasyndaǵy adamgershilik qarym-qatynastyń ónegeli ólshemine aınaldy.
Alǵys aıtý kúni – kúrdeli zamandy ıyq tirese birge eńserip, qysqa merzim ishinde Táýelsiz Qazaqstandy qurý jolynda aıanbaı ter tókken elimizdiń barlyq azamatttarynyń bir-birine qurmet bildiretin kún.
Elimizdegi Qazaqstan halqy Assambleıasy qurylǵan kún – 1 naýryzdy jyl saıyn barlyq etnostardyń bir-birine meıirbandyq tanytyp, ol adamdardy óz týǵanyndaı qabyldaǵan qazaqtarǵa alǵys aıtý kúni retinde atap ótýi óte ádiletti qadam boldy der edim. Bul kún bizdi burynǵydan da góri jaqyndastyra túsip, meıirimdiliktiń, búkil qazaqstandyqtardyń bir-birine degen dostyǵy men mahabbatynyń jarqyn merekesine aınaldy. Bul kún taǵdyr toǵystyrǵan Qazaqstannyń kópetnosty halqynyń ortaq tarıhyn qurmetteý kúni bolady.
Alǵys aıtý kúni – qaıyrymdylyq dástúrlerin, áleýmettik yntymaqty jáne ózara kómek kórsetýdi qoldaý kúni. Bul – repressıa men jer aýdarý jyldarynda bizdiń qazaq halqynyń kórsetken meıirimdilik pen aqkóńildik, qolda barmen bólisý, kómek kórsetý syndy rýhanı dástúrleri kúni.
Osy kúni men ózimniń týǵan Otanyma, týǵan halqyma aınalǵan Qazaq halqyna sheksiz alǵysymdy bildiremin. «Qazaǵym barda – men barmyn!» dep taǵy da aıtqym keledi.