Aqtoǵaı aýdanyndaǵy Qarabıe qorymyn zertteý barysynda ǵalymdar oń qolynda qola qylysh ustaǵan jaýyngerdiń buzylmaǵan qabirin anyqtady, - dep habarlaıdy Aqshamnews.kz.
Jerleý ornynan uzyndyǵy shamamen 30 santımetr bolatyn qos júzdi, tutas quıylǵan qola semser tabylǵan. Qarý dala jyrtqysh qustarynyń beınelerimen bezendirilgen. Sarapshylardyń pikirinshe, mundaı pishindegi ári kórkem órnektelgen akınak Qazaqstan aýmaǵynan buryn-sońdy tabylǵan emes. Bul - ejelgi sheberlerdiń metal óńdeý isi men kórkemdik talǵamynyń joǵary deńgeıin dáleldeıtin qundy jádiger.
Arheologter qylyshpen qatar bes metal jebe ushyn jáne altyn syrǵa tapqan. Zertteýshiler altyn áshekeıdi jaýyngerdiń qoǵamdaǵy joǵary mártebesiniń belgisi dep sanaıdy. Zattardyń kórkemdik ereksheligi Taldy-2 qorymyndaǵy «Altyn adam» tabystarymen uqsas.
Mamandardyń málimetinshe, qabir bizdiń dáýirimizge deıingi VII–VI ǵasyrlarǵa jatady jáne ol saq elıtasynyń jaýyngerine tıesili bolýy múmkin. Eń mańyzdysy - №1 qorǵannyń tolyǵymen saqtalǵany, bul arheologıalyq tájirıbede óte sırek kezdesedi.
Qazir tabylǵan buıymdar oblystyq tarıhı-ólketaný murajaıyna tapsyrylmaq. Aldaǵy ýaqytta ǵalymdar metalografıalyq, radıokómirtekti jáne antropologıalyq zertteýler júrgizýdi josparlap otyr. Zertteý nátıjeleri keler jyldyń qysynda jarıa etiledi dep kútilýde.