Eresekterge arnalǵan spektáklder sahnalaýdaǵy tájirıbesi kásibı mamandar tarapynan joǵary baǵalanyp kele jatqan teatr ujymy bıylǵy jyldyń ekinshi jartysynda qatarynan úsh teatr festıvalinde baq synamaqshy.
Óner ordasynyń basty maqsaty – balalardy ǵana emes, eresekterdi de tylsymyn ishine búkken qýyrshaq ónerine qyzyqtyrý. Endeshe, teatr ujymy sol mısıasyn tek elimizde ǵana emes, shetelde de dáripteýdi jolǵa qoıyp otyr. Qazaq qýyrshaq óneriniń múmkindigin tanytatyn alǵashqy óner dodasy Halyqaralyq sarapshylar men teatr synshylarynyń basyn qosatyn «TeArt – kókshe» teatr festıvali bolsa, Qaraǵandy qalasynda alǵash ret ótkizilgeli otyrǵan «Syn – shyn bolsyn» respýblıkalyq teatrlar festıvalinde de qýyrshaq teatry elimizdiń birneshe oblystarynan saraptalyp alynǵan úzdik qoıylymdar qatarynda baq synaıdy. Atalǵan óner dodalaryna eresekterge arnalǵan «Men bir jumbaq adammyn... Abaı» (rej. A.Zaısev) jáne álemdik klasıka «Romeo men Djýletta» (rej. D.Jumabaeva) qoıylymdary qatysatyn bolady.
Ońtústik astananyń mádenı deńgeıin odan ári arttyrý, qazaq óneriniń álem keńistiginde tanylýyna yqpal etý maqsatynda teatr ujymy attanatyn Halyqaralyq «Ankara» qýyrshaq teatrlary festıvaliniń de mańyzy zor. Aǵymdaǵy jyldyń qazan aıynda saltanat quratyn óner báıgesi Túrkıa memleketi, Ankara qalasynda ótpek. Teatr repertýaryna bıylǵy jyl qosylǵan eresekterge arnalǵan «Makbet.Illúzıa» (rej. D.Jumabaeva) jáne balalarǵa arnalǵan «Úıshik» (rej. A.Zaısev) qoıylymdary usynylatyn bolady.
Esterińizge sala keteıik, óner dodalarynda baq synaıtyn eresekterge arnalǵan spektáklder ár jyly otandyq jáne sheteldik teatr festıválderinde kásibı teatr synshylary tarapynan joǵary baǵaǵa ıe bolyp, qýyrshaq teatrynyń múmkindigin tereń tanytyp kele jatqan kórkem týyndylar qatarynda. Endeshe, qupıasy mol qýyrshaq óneriniń kezekti sapary sátti, mereıi ústem bolǵaı!