Bul týraly Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysynda aıtty.
«Investorlarǵa, mysaly, 50 mıllıon dollardan kóp qarjy salýǵa daıyn iri kompanıalarǵa «bir tereze» qaǵıdasymen jan-jaqty qoldaý kórsetken jón. Sonymen qatar, jobalardyń iske asyrylýyn qadaǵalaıtyn tıimdi monıtorıń júıesin iske qosý kerek. Memlekettik organdar paıdasy joq prezentasıalar men is-sharalar ótkizýmen áýestenbeýge tıis», - dedi Memleket basshysy.
Prezıdent mekeme basshylarynyń shetelge jasaǵan árbir issapary naqty nátıje berýi keregin atap ótti. Sapar qorytyndysy boıynsha Úkimet basshylyǵyna nemese qajet bolǵan jaǵdaıda Prezıdentke esep berilýi kerek.
«Investısıalyq jobalardy iske asyrýǵa qatysty kedergiler ásirese, aımaqtarda jıi bolyp turady. Ákimder ınvestısıa tartýdyń ornyna eski ádetke salyp, búdjet qarajatyna senip otyrady. Al, aımaqtarǵa baryp, jumys istegisi keletin ınvestor kóptegen tosqaýylǵa tap bolady. Jergilikti bılik kóp jaǵdaıda eshqandaı áreket jasamaıdy ne bolmasa ınvestordy áýre-sarsańǵa salady. Sonyń kesirinen kásipker jobasyn keıinge shegeredi nemese birjola toqtatýǵa májbúr bolady», - deıdi Prezıdent.
Aımaqqa jeke ınvestısıa tartý ákimderdiń eń basty mindetiniń biri bolýy kerek.
«Jalpy, barlyq memlekettik organ el ekonomıkasyna meılinshe kóbirek ınvestısıa tartýǵa basa mán berýge tıis. Bul – negizgi basymdyq, olardyń jumysy da soǵan sáıkes baǵalanýy kerek. Másele shtat sanyn kóbeıtip, jumys tobyn quryp, jańa tujyrymdama jazýda emes. Bul, eń aldymen, memlekettik apparattyń jumys isteý tásilin ózgertetin naqty reforma. Sony durys túsiný qajet. Biz jarty jyldyń nátıjesi boıynsha Investısıalyq shtabtyń jumysyn qorytyndylaımyz. Árbir mınıstr men ákimniń osy baǵytta atqarǵan jumysyna naqty baǵa beremiz. Talap qatań bolady», - dep eskertti Qasym-Jomart Toqaev.