Memlekettik rámizderge – 30 jyl
Qazirgi tańda jastardyń boıynda patrıottyq, otansúıgishtik sezim basym. Onyń dáleli, elimiz jastary búginde bilim, ǵylym, mádenıet, órkenıet, komýnıkasıa, sport jáne t.b salalar boıynsha úlken jetistikke jetip, álem bıigine kóterilýde jáne memleketaralyq syndarda jaqsy nátıje kórsetýde. Memleket tarapynan jas býyn ókilderine aıtarlyqtaı kóńil bólinýde. Bul jolda olarǵa barlyq jaǵdaılar jasalǵan. Memlekettik baǵdarlamalar boıynsha kez kelgen shetelge baryp bilim alý múmkindigi, elimizde halyqaralyq deńgeıde bilim beretin oqý mekemeleriniń ashylýy, halyqaralyq standarttarǵa sáıkes kóptegen mádenı-sporttyq ǵımarattardyń ashylýy, basqa eldermen tyǵyz baılanystaǵy túrli jumystar, seriktestik qarym-qatynas munyń bári bolashaq urpaq úshin jasalyp jatqan ıgi ister.
Búgingi jastar osyndaı múmkindikti paıdalana otyryp, jaqsy bilim alyp, ǵylymı izdenisterge barýda. Álemdik arenada otandyq kundylyqtardy dáripteý baǵytynda da ilgerileýshilikter bar. Eldik murattardy, memlekettilikti, ana tilimiz ben tarıhymyzdy qasterleýde rýhanı ósý bar, básekege qabilettilikke umtylys bar.
Memlekettik rámizderdi bilý men taný, patrıotızm deńgeıiniń monıtorıńi ózgeristerdi anyqtaýǵa jáne jumys sapasyn taldaýǵa múmkindik ashylyp otyr. Osy oraıda, bilim alýshylardyń otansúıgishtikke degen kózqarasy men qatynasynyń ózgergenin aıta ketken jón. Búginde jastar patrıotızmdi jalpyadamzattyq qundylyq dep biledi. Memleket pen qoǵam aldynda jaýapkershilikti túsinetin oqýshylar sanynyń artýy qýantady.
Memleket, mektep jáne otbasy birigip, kúsh salǵanda ǵana óskeleń býynǵa patrıottyq tárbıe berýdiń tıimdiligi arta túsetinin túsine bilýdiń mańyzy zor. Osy úshtaǵannyń tyǵyz baılanysta bolyp, ortaq iske jaýapkershilikpen qaraýy oqýshy tulǵasynyń tolyqqandy damýyna múmkindik bermek.
Otansúıgishtikti, eljandylyqty qalyptastyratyn qundylyqtardyń biri – memlekettik rámizderdi ulyqtaý. Qazaqstandyq patrıotızmdi, toleranttyqty, joǵary mádenıetti nyǵaıtý taqyryby eshýaqytta ózektiligin joıǵan emes.
Memlekettik rámizder – bizdiń memlekettiligimizdi, táýelsizdigimizdi bildiretin eń negizgi ulttyq sımvoldarymyz. Memlekettik rámizderdi qurmetteý – memleketti qurmetteý. Ony aıaqasty etýge jol berýge bolmaıdy.
Memlekettik sımvoldarǵa baılanysty qoǵamda keleńsiz jaıttar oryn alǵanyn jasyra almaımyz. Bul – jedel túrde shara qabyldaıtyn mańyzdy másele. Bul týraly Ákimshilik kuqyq buzýshylyq kodeksinde naqty belgilengen. Sondyqtan aıyppul salý arqyly mundaı jaıttarǵa tyıym salýdy údete túsý kerek. Qazirgi tańda mundaı keleńsizdikter ortalyq jáne jergilikti memlekettik organdar tarapynan qatań qadaǵalanyp, baqylaýǵa alynǵan. Memlekettik rámizderdi óńdep shyǵarýshy uıymdarmen tyǵyz qarym-qatynasta jumys jasaýdy júıeli túrde jolǵa qoıý kerek. Bul máseleni sheshýde azamattyq qoǵamdy da belsendi qatystyrýymyz qajet. Mundaı jaǵdaı, kóbinese, memlekettik sertıfıkaty joq uıymdarǵa tapsyrys bergennen bolatyny baıqalyp otyr. Bul – boıynda patrıottyq sezimi bar kez kelgen adamdy oılandyrmaı qoımaıtyn jalpyǵa ortaq másele. Sondyqtan atalǵan másele boıynsha jappaı qoǵam bolyp, el bolyp kúresý kerek. Bul – ár adamnyń sana-sezimine baılanysty. Búginde Qazaqstan álemniń barlyq elimen tyǵyz qarym-qatynasta jumys isteýde. Sondyqtan sheteldiń týyn qala ishinde ruqsatsyz tasymaldap júrgenderdi jergilikti atqarýshy bılik oryndary qatań jazaǵa tartý kerek.
Elimiz egemendigin alyp, Táýelsizdiktiń aq tańyn qarsy alǵan ýaqyttan bastap óskeleń urpaqty patrıotızmge tárbıeleý mindetine basa mán bere bastady. Ásirese, mektep oqýshylarynyń boıyna otanshyldyq rýhty uıalatý jaýapkershiliginiń júgi basym. Osy oraıda, mektep jumysy bilim alýshyny belgili bir bilimmen ǵana qamtamasyz etýge emes, bilim salasyndaǵy negizgi qujattar jáne baǵdarlamalyq jobalar sheńberinde qoıylǵan mindetter men maqsattardy sheshýge baǵyttalýy tıis ekenin esten shyǵarmaǵan abzal sıaqty. Bizdiń aldymyzda Qazaqstannyń jańa azamatyn jáne patrıotyn tárbıeleý mindeti tur.
Jas býynǵa patrıottyq tárbıe berýde memlekettik rámizderdiń alar orny erekshe. Elimizdiń óz aldyna derbes memleket ekenin aıǵaqtaıtyn, qazaq halqynyń darqandyǵy men keńdigin beıneleıtin tól nyshandardy qurmetteý – Otanǵa degen súıispenshiliktiń, joǵary azamattyǵymyzdyń kórinisi. Bir shańyraq astynda, yntymaq pen birlikte ómir súrip jatqan júzden astam ult pen ulysty biriktirýde de memlekettik rámizderdiń úlesi aıryqsha.
Árbir azamat memlekettiliktiń qalyptasý úderisinde rámizderdiń máni men alar ornyn, mańyzdylyǵyn túsine otyryp, elimizdiń Memlekettik Týy, Eltańbasy men Ánuranyn qurmetteýdi azamattyq paryzym dep bilýi tıis. Respýblıkanyń memlekettik nyshandaryn qurmettemegeni, syılamaǵany úshin jaýapkershilikti sezinýi shart jáne memlekettik rámizder men onyń belgileri týraly tereń bilgeni jón. Ol úshin mektepter men kásiptik bilim berý oryndarynda rámizder týraly arnaıy sabaqtar ótkizilip, túrli vıktorınalyq oıyndar ótkizýdi qolǵa alý qajet.
Búgingi tańda memlekettik rámizder tarıhyna qatysty qundylyqtar júıesi bir arnaǵa shoǵyrlanǵan desek te, onyń ótkizilýi óte sırek. Bilim oryndary ıntellektýaldyq oıyndar ótkizýdiń negizgi uıymdastyrýshysy bolyp tabylýy tıis. Oǵan AMANAT partıasy bastamashylyq tanytqany abzal. Týǵan elimizdiń Eltańba, Ánuran jáne Týynyń qandaı sıpatta ekendigin bilý ǵana emes, rámizderdiń paıda bolý tarıhyn zerdelep oqý arqyly óskeleń urpaq Táýelsizdiktiń qundylyqtaryn tereńirek túsineri haq.
«Qazaqstannyń rámizderi» oqý materıaldary jas býynnyń oı-órisin damytý, taný prosesinde tanym bıigin qalyptastyrýdy ushtaıdy.
Qazaqstannyń memlekettik rámizderine arnalǵan oqýshylyq zertteý jumystaryn óz betinshe tanyp bilýi jas býynnyń belsendi azamattyq baǵytyn, áleýmettik jaýapkershiligin, patrıottyq sezimin, joǵary adamgershilik jáne kóshbasshylyq qasıetterin qalyptastyrary haq.
Osydan birneshe jyl buryn Qytaıda bolǵanymyzda, el astanasynyń ortalyq Tánanmen alańyndaǵy Memlekettik Týdyń túngi ýaqytta kúzetke tapsyrylý saltanatyn kórdik. Sóıtsek, onyń óz prosedýrasy bar eken. Tańerteń bir vzvod jaýynger Memlekettiń bas Týyn ortalyq alańdaǵy tuǵyrǵa ákelip ornatyp, ony kesh qaraıǵan soń qaıtadan jınap áketedi eken. Ádet-ǵuryp salttaryna berik Qytaı eli Memlekettik Týdy kózdiń suǵynan, jamannyń sózinen saqtaýdy dástúrge aınaldyrǵan ba dep qaldyq. Sol kúni alańda halyq kóp boldy. Elge keletin týrıser de osy sátti kórýge qushtar kórinedi.