Túrkistan oblysynyń polıseıleri memlekettik nómirlerdi qoldan jasaǵan sehty anyqtady
Túrkistan oblysynyń polıseıleri 103 nómirlik belgini, 100-den astam gologrammlyq japsyrmalardy jáne nómir jasaýǵa arnalǵan arnaıy stanokty tapty, – dep habarlaıdy almaty-akshamy.kz Polisia.kz. silteme jasap.
Túrkistan oblysy polısıa departamentiniń uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda kólik quraldary úshin jalǵan memlekettik nómirlik belgilerdi zańsyz daıyndaǵan sehty anyqtady.
Máselen, Samara – Shymkent tas jolynda jedel ýákilder jergilikti polısıa qyzmetimen birlesip júrgizgen jedel sharalar kezinde Nıva avtokóliginiń memlekettik nómiri jalǵan bolýy múmkin ekenine kúmándandy.
Polıseıler tez arada jedel áreket etip, kólik nómirine qatysty jumystardy atqara bastaıdy. Osylaısha olar kóliktiń júrgizýshisine taqqan nómiriniń basqa adamǵa tirkelgenin aıtyp, túsindiredi. Odan ári qaraı qyraǵylyq tanytqan saqshylar arnaıy jospar quryp, jedel-izdestirý jáne arnaıy is-sharalar keshenin ótkizedi.
Nátıjesinde Shymkent qalasynda memlekettik nómirlerdi qoldan jasap jatqan sehty anyqtap, onyń ıesi retinde jergilikti turǵyndy ustady.
Tintý kezinde polısıa qyzmetkerleri 103 nómirlik belgini, 100-den astam gologrammlyq japsyrmalardy jáne nómir jasaýǵa arnalǵan arnaıy stanokty tapty. Bul fakt QR QK-niń 386-baby 1-bóligi boıynsha tirkeldi. Bolǵan oqıǵanyń barlyq jaıy anyqtalyp jatyr.