Memlekettik nagradalarmen marapattalǵan azamattardyń elge sińirgen eńbegi Prezıdent Qasym-Jomart Toqaevtyń Ulttyq quryltaıdyń úshinshi otyrysynda aıtqan jalpyulttyq qundylyqtarymen tolyq úndesedi.
Birinshiden, memlekettik marapatqa ıe bolǵan azamattardyń basym bóligi, ıaǵnı 450-den astam adam – jumysshy mamandyqtarynyń ókilderi, atap aıtqanda shahterler, kólik qyzmetkerleri jáne basqa da óndiris salasynyń mamandary. Sondaı-aq jalpy jumys ótili júzdegen jyldardy quraıtyn eńbek dınastıa ókilderine de aıryqsha mán berildi. Osylaısha, Memleket basshysy eńbekqorlyq pen kásibı biliktilik qundylyqtaryn ıdeologıanyń mańyzdy baǵyty retinde dáripteýdiń ózekti ekenine nazar aýdardy.
Ekinshiden, «Qazaqstannyń Eńbek Eri» joǵary ataǵyn alǵan tórt adamnyń úsheýi ǵylym men bilim salasynyń ókilderi ekenin erekshe atap ótý kerek. Munyń bári ǵylym men bilimdi damytýǵa, ǵalymdar men ustazdardyń mártebesin kóterýge qatysty naqty is-sharalardy josparly túrde júrgizip jatqan Prezıdent saıasatynyń birizdiligin kórsetedi. 137 muǵalim men 80 ǵalymnyń marapattalýy – memlekettik saıasattyń ozyq oıly qoǵamdy qalyptastyrýǵa, jasampazdyq pen jańashyldyq qundylyqtaryn nasıhattaýǵa baǵyttalǵanyn aıǵaqtaıdy.
Úshinshiden, marapattalǵan azamattardyń arasynda Serjan Shákirat, Nurlan Ónerbaı, Seken Turysbekov, Maıra Muhamedqyzy, Samal Eslámova jáne t.b. sıaqty óner salasynyń maıtalmandary da az emes. Sol arqyly Memleket basshysy ult rýhanıatyn damytýdyń jáne qoǵamda joǵary mádenıet qalyptastyrýdyń mańyzdylyǵyn pash etti.
Prezıdent Ulttyq quryltaıdyń otyrysynda bilim, ǵylym jáne mádenıetti qazirgi qoǵamnyń úshtaǵany dep atady. Jalpy, Prezıdenttiń Atyraýdaǵy otyrysta aıtqan ıdeologıalyq tezısteri naqty qadamdar men bastamalar arqyly júzege asyrylyp jatyr.