Óńirlik komýnıkasıalar qyzmetiniń alańynda Qazaqstan Respýblıkasy Konstıtýsıasynyń 30 jyldyǵyna arnalǵan brıfıń bolyp ótti. Pres-konferensıanyń spıkeri – Almaty qalasy Azamattyq alánsynyń tóraǵasy, qalalyq qoǵamdyq keńestiń múshesi Qaıyrjan Ábdihalykov. Ol azamattardy konstıtýsıalyq mindetin umytpaýǵa shaqyryp, eldiń Negizgi Zańynyń turaqtylyǵy men ózektiligin atap ótti.
"30 jyl ishinde biz Qazaqstan Respýblıkasynyń Konstıtýsıasy – turaqty ári ómirsheń qujat ekenine kóz jetkizdik. Ol elmen birge damyp, ishki jáne syrtqy syn-qaterlerge jaýap berip keledi. Konstıtýsıa – bul jaı ǵana erejeniń jıyntyǵy emes. Bul – bılik tarmaqtarynyń mártebesinen bastap, ár azamattyń quqyǵy men mindetine deıingi úlken júıe. Ol bizdiń demokratıaǵa, adamgershilik pen áleýmettik ádildikke negizdelgen memleket retindegi bolmysymyz. Reformalardyń nátıjesinde azamattardy memleketti basqarýǵa qatystyratyn jańa tetikter engizildi. Ashyqtyq, jarıalylyq, bıliktiń esep berýi – bul qur uran emes, búginde naqty jumys istep turǵan qaǵıdalar. Konstıtýsıa bizge quqyq berýmen qatar, mindet te júkteıdi. Memlekettiń ıgiligin kórip, osy elde ómir súrip jatsaq, Konstıtýsıada kórsetilgen mindetterimizdi de oryndaýǵa tıispiz", – dedi Qaıyrjan Ábdihalykov.
Spıkerdiń aıtýynsha, Konstıtýsıa – zańnamalyq júıeniń irgetasy ǵana emes, sonymen qatar azamattar men memlekettik ınstıtýttardyń ómir súrý qaǵıdattaryn aıqyndaıtyn mańyzdy qujat. Qazirgi ýaqytta barlyq mınıstrler men jergilikti atqarýshy organdardyń basshylary halyq aldynda esep berýge mindetti. Mundaı ózgeris konstıtýsıalyq normalardyń arqasynda iske asyp otyr.
Brıfıń barysynda sońǵy jyldaǵy reformalarǵa, ásirese 2022 jylǵy maýsymda ótken referendýmnan keıin engizilgen ózgeristerge aıyryqsha nazar aýdaryldy. Sonymen qatar, Qaıyrjan Ábdihalykov azamattyq qoǵamdy damytýdyń mańyzyna toqtalyp, memlekettik baǵdarlamalar men búdjet shyǵynyn baqylaýda qoǵamǵa keń múmkindik beretin Qoǵamdyq baqylaý týraly zańnyń qabyldanǵanyna alǵys bildirdi. «Bul – shyn máninde revolúsıalyq qadam. Ol Konstıtýsıanyń halyq úshin jazylǵanyn, adam múddesin birinshi orynǵa qoıatyn qaǵıdalarǵa negizdelgenin kórsetedi», – degen spıker, Konstıtýsıa resmı memlekettik rámiz bolmasa da, qoǵamdyq sananyń erekshe nysany retinde qabyldanatynyn, ári memleket pen qoǵamnyń damýyndaǵy basty baǵdardyń biri bolýy tıis ekenin eske saldy.