Almatyda jyl basynan beri 7753 azamat jalpy somasy 129 933 066 teńgege memleket kepildik bergen zań kómegin aldy.
Óńirlik komýnıkasıalar qyzmetiniń brıfıńinde Ádilet departamentiniń ókilderi zańgerlik keńes alý tártibi týraly aıtty, dep habarlaıdy Almaty-akshamy.kz.
Memleket kepildik bergen zań kómegi – ony alýǵa quqyǵy bar jeke jáne zańdy tulǵalarǵa kórsetiletin zań kómegi.
«Kepildendirilgen memlekettik zań kómegi jáne azamattarǵa keshendi áleýmettik zań kómegin kórsetý - ádilet organdarynyń mańyzdy baǵyttarynyń biri bolyp tabylady. Qazaqstan Respýblıkasynyń árbir azamaty azamattyq, ákimshilik jáne qylmystyq prosester sheńberinde bilikti zań kómegin alýǵa ajyramas quqyqqa ıe. Memleket Qazaqstan azamattaryna ádildik pen zań aldyndaǵy teńdik qaǵıdattary negizinde bul qoldaýǵa kepildik beredi», - dedi Almaty qalasy Ádilet departamenti basshysynyń orynbasary Qanat Bazarbaev.
Memleket kepildik bergen quqyqtyq keńes berý túrindegi zań kómegi alıment óndirip alý, zeınetaqy men járdemaqy taǵaıyndaý, ońaltý, bosqyn nemese qandas mártebesin alý, ata-anasynyń qamqorlyǵynsyz qalǵan kámeletke tolmaǵandarǵa; jynystyq zorlyq-zombylyq qurbandaryn; adam saýdasy, terorızm aktisi qurbandaryna ne osy derekterge baılanysty olardyń quqyqtary men zańdy múddelerin qamtamasyz etý jáne qorǵaý máseleleri boıynsha azaptaýǵa ushyraǵandarǵa; jeke tulǵalarǵa asyraýshysynyń qaıtys bolýynan keltirilgen zıandy óteý máseleleri boıynsha; jeke tulǵalarǵa jumysyna baılanysty, bolmasa, qylmystyq quqyqbuzýshylyq saldarynan densaýlyǵyna zaqym kelgen jaǵdaıda; Uly Otan soǵysynyń qatysýshylary bolyp tabylatyn jeke tulǵalarǵa, jeńildikter boıynsha Uly Otan soǵysynyń qatysýshylaryna teńestirilgen adamdarǵa, sondaı-aq basqa memleketter aýmaǵyndaǵy jaýyngerlik is-qımyldar ardagerlerine, merzimdi qyzmettegi áskerı qyzmetshilerge, birinshi jáne ekinshi top múgedektigi bar adamdarǵa keltirilgen zıandy óteý máseleleri boıynsha jeke tulǵalarǵa jasyna baılanysty, kásipkerlik qyzmetpen baılanysty emes máseleler boıynsha zeınetkerler; kásipkerlik qyzmetpen baılanysty emes máseleler boıynsha kóp balaly otbasylarǵa; jan basyna shaqqandaǵy ortasha tabysy oblystarda, respýblıkalyq mańyzy bar qalalarda, astanada belgilengen kedeılik sheginen bir aı tómen az qamtylǵan adamdarǵa (otbasylarǵa) kásipkerlik qyzmetpen baılanysty emes máseleler boıynsha kórsetiledi.
Sottarda, qylmystyq qýdalaý organdarynda, ózge de memlekettik organdar men memlekettik emes uıymdarda jeke tulǵalardyń múddelerin qorǵaý túrindegi memleket kepildik bergen zań kómegi ákimshilik jaýapkershilikke tartylǵan adamdarǵa; talap qoıýshylar men jaýap berýshilerge; qylmystyq-prosessýaldy zańnamaǵa sáıkes kúdiktilerge, aıyptalýshylarǵa, sottalýshylarǵa, sottalǵandarǵa, aqtalýshylarǵa jáne jábirlenýshilerge kórsetiledi.
«Joǵaryda atalǵan barlyq azamattar turǵylyqty jeri men ornalasqan jerine qaramastan Qazaqstan Respýblıkasynyń aýmaǵynda memleket kepildik bergen zań kómegin alýǵa quqyly. Memleket kepildik bergen zań kómegine muqtaj adamnyń múddesi úshin osyndaı kómek kórsetý týraly ótinishpen onyń ókili zańdarda belgilengen tártippen júgine alady», - dep tolyqtyrdy spıker.
Keshendi áleýmettik zań kómegi - bul zań kómegin kórsetý týraly shart negizinde advokattar usynatyn zań kómeginiń túri. Ol Qazaqstan Respýblıkasynyń áleýmettik qorǵaý týraly zańnamasyn negizge ala otyryp, osy toptaǵy adamdarǵa arnalǵan. Osylaısha, KÁZK kelesi sanattar boıynsha kórsetiledi:
-arnaýly áleýmettik qyzmetterge muqtaj adamdar;
-arnaýly áleýmettik kómek alý quqyǵy bar tulǵalar;
-UOS qatysýshylary jine jeńildikter boıynsha olarǵa teńestirilgen tulǵalar;
- QR aýmaǵynan tys basqa memleketterdiń aýmaǵyndaǵy áskerı qımyldarynyń ardagerleri;
- Birinshi jáne ekinshi top múgedekterine;
- Jasy boıynsha zeınetke shyqqandarǵa;
- Arnaýly áleýmettik qyzmet kórsetý ortalyqtarynda turatyn qarttar men múgedektigi bar adamdarǵa.
- Múgedektigi bar balalardy jalǵyz tárbıelep otyrǵan nemese múgedektigi bar kámeletke tolǵan adamdardyń qamqorlyǵyndaǵy adamdarǵa.
Azamattyq sot isin júrgizý sheńberinde kásipkerlik qyzmetke baılanysty daýlar boıynsha keshendi áleýmettik zań kómegi kórsetilmeıdi.
Sondaı-aq, zań konsýltanttary kórsetetin keshendi áleýmettik zań kómegin alý úshin azamattar Almaty qalasynyń Ádilet departamentine júgine alady.
«Azamattar «keshendi áleýmettik zań kómegi» qyzmetin alý úshin Almaty qalasynyń Ádilet departamentine júginýge quqyly, ony zań konsýltanttary Pro bono túrinde óteýsiz negizde kórsetetin bolady, bul zań qoǵamy ókilderiniń arasynda halyqaralyq tájirıbede bar jáne onyń ishinde Qazaqstan da bar», - dep tolyqtyrdy spıker.
Zańgerlik keńes alý úshin Ádilet departamentine nemese kelesi telefon nómirleri boıynsha habarlasýǵa bolady: 119 nemese 1414 (Quqyqtyq aqparattyq qyzmet).