Azamattyq forým sheńberinde Qazaqstan Respýblıkasy Ǵylym jáne joǵary bilim mınıstrligi, CCI Kazakhstan kompanıasy men ««Jasyl ekonomıkany» qoldaý jáne G-Global-dy damytý» Koalısıasy» ZTB arasynda «ReStart» birlesken jobasyn iske asyrý jónindegi is-sharalar josparyna qol qoıý rásimi ótti, - dep habarlaıdy Aqshamnews.kz.
Jospar el prezıdenti Qasym-Jomart Toqaevtyń 2025 jylǵy 8 qyrkúıektegi Qazaqstan halqyna Joldaýyn iske asyrý aıasynda, Joldaýda kórsetilgendeı aýqymdy ekologıalyq apat qaýpine alańdaýshylyq týǵyza otyryp, stýdent jastardy Qazaqstanda ekologıalyq mádenıetti qalyptastyrýǵa jáne aınalmaly ekonomıkany damytýǵa tartý baǵytynda, sondaı-aq «Bilim týraly» QR Zańyna sáıkes ázirlendi.
Qol qoıylǵan jospardyń maqsaty – ekologıa, turaqty damý jáne ekologıalyq bilim berý salasyndaǵy bastamalardy iske asyrý úshin memlekettiń, azamattyq qoǵamnyń jáne bıznestiń ózara is-qımylynyń naqty platformasyn qurý.
Joba ekologıalyq mádenıetti damytýǵa, turaqty damý qaǵıdattaryn ilgeriletýge jáne «jasyl ekonomıka» negizderin eldiń joǵary bilim berý júıesine engizýge baǵyttalǵan. Jospardyń negizgi mindetteriniń qatarynda ekologıalyq bilim berý jáne tárbıe salasyndaǵy Jastar bastamalaryn damytýǵa járdemdesý, JOO bazasynda stýdenttik eko-klýbtar men ǵylymı qaýymdastyqtardy damytý, qaldyqtardy bólek jınaý jáne «jasyl kampýstardy» damytý jónindegi jobalardy iske asyrý, sondaı-aq «jasyl» jobalardy ilgeriletý jáne seriktester men ınvestorlardy tartý bar.
Jospar CCI Kazakhstan kompanıasynyń on jyldyq tájirıbesi men tabysty «3.2.1. Start!» jobasynyń jetistikterine negizdelgen, jáne de ol joba bıylǵy jyly «ReStart» dep atalatyn jańa formatqa kóship, turaqty damý men eko-aǵartýǵa nazar aýdara otyryp, plasıkti bólek jınaý jáne qaıta óńdeý mádenıetin damytýdyń eń iri ekoplatformasyna aınaldy. Tek qana 2024 jyldyń ózinde qazaqstandyq joǵary oqý oryndarynyń stýdentteri – QazMAÝ, QBTÝ, Satbayev University, QazUAZÝ, M.Qozybaev atyndaǵy SQÝ jáne basqalar -17 tonnadan astam plasıkalyq qaldyqtardy jınap, olardy jańa buıymdarǵa aınaldyrǵan.
2025 jyly jobanyń toǵyzynshy maýsymynda stýdentterdiń jalpy sany 100 myńnan asatyn 14 JOO qatysty. Bir jyl ishinde stýdentter 35 tonnadan astam plasık jınady, bul ótken maýsymnyń kórsetkishterinen asyp tústi jáne joba búkil el boıynsha 15 senbilik ótkizdi.
CCI Kazakhstan kompanıasynyń korporatıvtik jáne retteýshi qatynastar jónindegi dırektory Álıma Isembaeva josparǵa qol qoıý rásiminde sóz sóıledi.
«Bıyl joba óziniń onjyldyǵyn atap ótýde, ol damýdyń jańa kezeńimen — «ReStart» jańartylǵan ataýymen jáne aýqymdy mısıasymen, stýdentterdiń kúndelikti ómirine qaldyqtardy júıeli túrde bólek jınaýdy jáne ornyqty damý qaǵıdattaryn engize otyryp, Qazaqstannyń odan da kóp ýnıversıtetterin qamtý syndy máselelermen saı kelip otyr. Ǵylym jáne joǵary bilim mınıstrligimen birlesip jumys isteý-azamattyq qoǵamnyń, memlekettiń jáne bıznestiń tıimdi seriktestigi naqty nátıjelerge qalaı qol jetkizetinin jáne ekologıalyq jaýapty urpaqty qalyptastyra alatynyn kórsetetin mańyzdy qadam»,-dep atap ótti.
Jobany iske asyrý jyldarynda ondaǵan stýdenttik eko-klýbtar quryldy, qaldyqtardy bólek jınaý jáne qaıta óńdeý boıynsha kóptegen bastamalar ázirlendi, olardyń kópshiligi ýnıversıtetterdiń turaqty tájirıbesine aınaldy.
Atap aıtqanda, Satbayev University-de plasıkalyq qaqpaqtardy jınaý jáne olardy shaǵyn sáýlet nysandarynyń elementterine qaıta óńdeý júıesi engizildi, QazUAZÝ-da «Jasyl kampýs» jobasy iske asyryldy, al M.Qozybaev atyndaǵy SQÝ-da stýdentter qaıta óńdelgen plasıkten jasalǵan kádesyı jelisin damytýda.
«ReStart» – tyń jarqyn túlekteriniń qataryna Rocket Plastic, Recycle Birge jáne EcoCashback – turaqty ınfraqurylymdar men damýdy jalǵastyratyn áleýmettik kásiporyndarǵa aınalǵan startaptar kiredi.
«ReStart» bastamasy - turaqty damýdyń jańa kezeńi jáne Qazaqstannyń 2030-kún tártibin iske asyrýǵa qosqan úlesi bolmaq.
Koalısıanyń Basqarma tóraǵasy Álıa Rahymbekova: «Biz memlekettiń, bıznestiń jáne azamattyq qoǵamnyń kúsh-jigerin biriktirý Qazaqstannyń BUU-nyń Turaqty damý maqsattaryna qol jetkizýi úshin berik negiz quratynyna senimdimiz»,-dedi.
««Jasyl ekonomıkany» qoldaý jáne G-Global-dy damytý» Koalısıasy» ZTB 2013 jyly qurylǵan sátten bastap Qazaqstanda turaqty damý jáne klımattyq aǵartý ıdeıalaryn ilgeriletýdiń saraptamalyq, ádistemelik jáne qoǵamdyq ortalyǵy sanalady.
Qazaqstan Respýblıkasy Ǵylym jáne joǵary bilim mınıstrliginen qujatqa Mınıstrliktiń Apparat basshysy Madıar Dúısenbaıuly Qojahmet qol qoıyp, Josparǵa qol qoıý ekologıalyq bilim berý men jastar tárbıesin damytýdaǵy mańyzdy qadam ekenin atap ótti.
««ReStart» jobasy-jastardyń ekologıalyq oılaýy men tabıǵatqa uqypty qaraý mádenıetin birlesip qalyptastyrýdyń jarqyn mysaly. Jospardy iske asyrý aıtarlyqtaı nátıje beretinine jáne Qazaqstannyń turaqty bolashaǵyn damytýǵa úles qosatynyna senimdimin», - dedi Madıar Dúısenbaıuly Qojahmet.