Otyrys barysynda Qasym-Jomart Toqaev Úkimet músheleri men óńirler ákimderiniń nazaryn halyqty alańdatqan birqatar ózekti máseleni sheshý qajettigine aýdardy.
Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy beınebaılanys rejıminde ótti, dep habarlaıdy Almaty-akshamy.kz Aqordaǵa silteme jasap.
İs-sharaǵa Premer-mınıstr Álıhan Smaıylov, Memlekettik keńesshi Erlan Qarın, Prezıdent Ákimshiliginiń basshylyǵy, Úkimet músheleri, oblystardyń, Nur-Sultan, Almaty, Shymkent qalalarynyń ákimderi, ortalyq memlekettik organdar men ulttyq kompanıalardyń basshylary qatysty.
Memleket basshysy elimizdiń kúrdeli geosaıası syn-qaterlerge qaramastan, birqalypty damyp kele jatqanyn atap ótti. Bıylǵy birinshi jartyjyldyqtyń qorytyndysy boıynsha ekonomıka 3,4 paıyzǵa, al naqty sektor 4,1 paıyzǵa ósken. Ásirese, óńdeý ónerkásibi salasynda aıtarlyqtaı ilgerileý bar.
«Inflásıa bir orynda turǵan joq. Qazir bul kórsetkish 14,5 paıyzǵa jetip, 2015 jylǵy deńgeıden asyp tústi. Birinshi jartyjyldyqta ekonomıkamyz qalpyna keldi. Biraq halyqaralyq ınstıtýttar Qazaqstannyń ishki jalpy ónimi bıyl 2 paıyzǵa ǵana ósedi dep boljap otyr. Buǵan deıin olar ósim 3,7 paıyz bolatynyn aıtqan edi. Sondyqtan Úkimet el ekonomıkasynyń ornyqty damýyn qamtamasyz etýge tıis. Eń bastysy, azamattardyń naqty tabysyn arttyrý qajet», – dedi Prezıdent.
Otyrys barysynda Qasym-Jomart Toqaev Úkimet músheleri men óńirler ákimderiniń nazaryn halyqty alańdatqan birqatar ózekti máseleni sheshý qajettigine aýdardy. Prezıdent ınflásıany jáne azyq-túlik taýarlarynyń baǵasyn turaqtandyrý, azamattardyń tabysyn arttyrý jáne adamı kapıtaldy damytý, aqsha-nesıe jáne salyqtyq-búdjet saıasatyn jetildirý, ekonomıkanyń naqty sektoryna qoldaý kórsetý, energetıkalyq qaýipsizdikti qamtamasyz etý, avtojol ınfraqurylymyn damytý sıaqty máseleler boıynsha naqty mindetter júktedi.
Memleket basshysy Premer-mınıstr Álıhan Smaıylovtyń jáne Ulttyq bank tóraǵasy Ǵalymjan Pirmatovtyń baıandamalaryn tyńdap, Úkimet jumysynyń nátıjesine ortasha baǵa berdi.
Prezıdent mınıstrler men ákimderge, vedomstvolar men ulttyq kompanıalardyń basshylaryna jumys qarqynyn barynsha kúsheıtip, jańa ádister men tyń ıdeıalardy paıdalaný qajet ekenin aıtty. Sonymen qatar olarǵa elimizdiń áleýmettik-ekonomıkalyq damýyna qatysty birqatar mindet júktedi.
Jıyn barysynda Memleket basshysy Premer-mınıstrdiń orynbasary – Saýda jáne ıntegrasıa mınıstri Baqyt Sultanovqa, Aýyl sharýashylyǵy mınıstri Erbol Qarashókeevke, Ekologıa, geologıa jáne tabıǵı resýrstar mınıstri Serikqalı Brekeshevke sógis jarıalady, sondaı-aq Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınge eskertý jasady.