Prezıdent Qasym-Jomart Toqaev Túrkistan qalasyndaǵy Muz saraıyn aralady, dep habarlaıdy aqshamnews.kz.
Zamanaýı úlgide jabdyqtalǵan keshende short-trek, mánerlep syrǵanaý jáne hokeı sıaqty qysqy sport túrlerimen jyl boıy aınalysýǵa qajetti barlyq jaǵdaı jasalǵan.
Nysanda Italıa, Kanada, Germanıa, Fınlándıa elderinde shyǵarylǵan qondyrǵylar ornatylǵan. Arnaıy tehnologıa alańnyń pishinin ózgertýge múmkindik beredi. Sol arqyly muz aıdynynda bir mezgilde birneshe sport túrimen shuǵyldanýǵa bolady.
Qasym-Jomart Toqaev Muz saraıyn aralap kórip, balalardyń ónerin tamashalady. Sondaı-aq bapkerlermen jáne sportshylarmen kezdesti.
Prezıdent otandyq sportshylardy árdaıym qoldaıtynyn, jetistikterin baqylap otyratynyn aıtyp, olarǵa sáttilik tiledi.
Jergilikti «Turan Tigers» hokeı klýbynyń sportshylary Memleket basshysyna komandanyń jeıdesin syıǵa tartty.
Jalpy, Túrkistandy áleýmettik-ekonomıkalyq damytýdyń 2021-2025 jyldarǵa arnalǵan keshendi josparyna saı oblys ortalyǵynda «Túrkistan-arena» stadıony, kópbeıindi «Olımpık» ortalyǵy jáne Bekzat Sattarhanov atyndaǵy sport kesheni, «Turan» fýtbol akademıasynyń ǵımaraty boı kótergen. Sonymen qatar 7 tenıs korty salynyp, jalpy uzyndyǵy 51 shaqyrym velojol tóselgen.