Memleket basshysy Qasym-Jomart Toqaev Túrkıa Prezıdenti Rejep Taııp Erdoǵanmen kezdesti
Memleket basshysy Túrkıa Prezıdentiniń Qazaqstanǵa saparynyń máni zor ekenin atap ótip, búgingi kezdesý eki eldiń kópjaqty qarym-qatynasyn nyǵaıtýǵa jáne Túrki álemin damytýǵa tyń serpin beretinine nazar aýdardy.
Qasym-Jomart Toqaev samıt barysynda kótergen mańyzdy bastamalary men salmaqty oı-pikirleri úshin Rejep Taııp Erdoǵanǵa alǵys aıtty.
– Qadirli baýyrym, Atajurtqa qosh keldińiz! Túrkıa – bizdiń ejelden enshisi bir, tamyrlas týysymyz. Sondaı-aq Qazaqstannyń eń jaqyn ári senimdi strategıalyq seriktesi. Siz ózara qarym-qatynasty damytýǵa orasan zor úles qosyp kelesiz. Men ony joǵary baǵalaımyn. Aradaǵy turaqty kelissózderdiń arqasynda búginde kóptegen kelisimderimiz tabysty júzege asyrylýda. Byltyr ekijaqty taýar aınalymy 54 paıyzǵa ósip, 6,3 mıllıard dollar boldy. Osy kórsetkishti 10 mıllıard dollarǵa deıin jetkizýdi kózdep otyrmyz. Túrkıa – elimizdiń negizgi tórt saýda seriktesiniń biri. Investısıalyq yntymaqtastyq qarqyndy damyp keledi. Elimizde túrik kapıtalynyń úlesi bar 4300-den astam kompanıa jumys istep jatyr, – dedi Qasym-Jomart Toqaev.
Kezdesýde Qasym-Jomart Toqaev Rejep Taııp Erdoǵandy jáne túrik halqyn Túrkıanyń 100 jyldyǵymen quttyqtady. Sondaı-aq Memleket basshysy baýyrlas eldiń mereıtoıyna oraı Astanada Anadoly kóshesin, Shymkentte Túrkıa dańǵyly men saıabaǵyn jáne Almatyda Mustafa Kemal Atatúriktiń eskertkishin ashý josparlanyp otyrǵanyn aıtty.