Abaı ýnıversıteti 95 jyldyǵyn toılady
Abaı atyndaǵy Qazaq ulttyq akademıalyq opera jáne balet teatrynda qazaqtyń osynaý bas aqynynyń atyn ıemdengen Qazaq ulttyq pedagogıkalyq ýnıversıtetine 95 jyl tolýyna oraı merekelik shara ótti.
Atalǵan bilim ordasy – elimizde ashylǵan eń birinshi joǵary oqý orny. Oǵan qosa, Abaı atyndaǵy Qazaq ulttyq pedagogıkalyq ýnıversıteti joǵary jáne joǵary oqý ornynan keıingi bilim berý salasyndaǵy iri ǵylymı jáne pedagogıkalyq bilim berý ortalyǵy. Ýnıversıtettiń qalyptasýyna ult zıalylary – Ahmet Baıtursynuly, Halel Dosmuhamedov, Temirbek Júrgenov, Sáken Seıfýllın, basqa da kóptegen kórnekti qaıratkerler zor úles qosty.
95 jyldyq tarıhynda bilim men ǵylymnyń qara shańyraǵy búgingi kúnge deıin óz altyn uıasynan otandyq pedagogıkanyń damýyna tyń serpin berip, 200 myńǵa jýyq pedagog pen 4 myńnan asa ǵylymı kadrdy qanattandyrdy. Búginde ýnıversıtet álemniń 25 memleketiniń 138 joǵary oqý oryndarymen áriptestik baılanysta jumys isteıdi. Abaı ýnıversıteti álemdik jáne otandyq reıtıńterde úzdik ýnıversıtetter qatarynda.
«Ýnıversıtettiń 95 jyldyǵy – JOO-nyń osyǵan deıin jetken jetistigin túıindep, pysyqtap, aldaǵy ýaqyttaǵy jumystardy josparlaýǵa qolaıly meje. Demek, búgingi saltanatty sharada birinshiden, ýnıversıtettiń profesorlyq-oqytýshylyq quramy marapattalyp, qoshemetteldi. Ekinshiden, bul mereke – ýnıversıtettiń ár jyldarǵy túlekteri men osy kúngi oqyp júrgen stýdentter qaýymyna oqý ornynyń jetken jarqyn jetistikteri men alda kútip turǵan maqsat-mejelerin kórsetýge múmkindik beretin syndarly sát.
Ýnıversıtettiń irgetasyn qalaǵan tuńǵysh rektory Sanjar Asfendıarov, Ahań – Ahmet Baıtursynuly syndy arystarymyzdyń, Uly Muhań – Muhtar Áýezov, kóp jyldar boıy ýnıversıtet rektory bolǵan Keńes Odaǵynyń Batyry Málik Ǵabdýllın tárizdi ǵulama ǵalym, ulaǵatty ustazdardyń osy ýnıversıtette sabaq berip, ákimshilik qyzmet atqarǵanynyń ózi bizge úlken maqtanysh, sonymen birge zor jaýapkershilik te júkteıdi, – dedi Abaı atyndaǵy QazUPÝ-dyń Basqarma tóraǵasy – rektory Bolat Tilep.