Memleket basshysy baýyrlas Túrkıa Prezıdentimen Baký tórinde kezdesip otyrǵanyna qýanyshty ekenin jetkizip, bıyl Qazaqstan men Túrkıa arasyndaǵy Dostyq jáne yntymaqtastyq týraly kelisimge 30 jyl tolǵanyn atap ótti, dep habarlaıdy aqshamnews.kz
– Qazir de baýyrlastyq qarym-qatynasymyz qarqyndy damyp jatyr. Saıası deńgeıde syndarly dıalog bar. Úkimetterimizdiń yqpaldastyǵy artyp keledi. Túrkıa – Qazaqstannyń eń iri bes saýda seriktesiniń biri. Byltyr ekijaqty saýda-sattyq 6 mıllıard dollarǵa jetti, – dedi Qasym-Jomart Toqaev.
Sonymen qatar Prezıdent Túrkıanyń Qazaqstan ekonomıkasyna mol qarjy quıǵan negizgi ınvestorlardyń qatarynda ekenine nazar aýdaryp, túrik bıznesmenderiniń qatysýymen júzege asyrylyp jatqan ınvestısıalyq jobalar jeke baqylaýynda bolatynyn málimdedi. Rejep Taııp Erdoǵan Qazaqstan men Túrkıa arasyndaǵy qarym-qatynas strategıalyq sıpatta damyp kele jatqanyn atap ótip, eki eldiń saýda-ekonomıkalyq yntymaqtastyǵyn odan ári jandandyrý úshin mol áleýet bar ekenin aıtty.
– Qadirli baýyrym, kelesi jyly Ankarada ótetin Joǵary deńgeıdegi strategıalyq yntymaqtastyq keńesiniń 5-shi otyrysy barysynda aýyl sharýashylyǵy, qorǵanys, energetıka, kólik-logıstıka, sondaı-aq mádenı-gýmanıtarlyq salalarda mańyzdy kelisimderge qol jetkizetinimizge senimdimin. Biz Qazaqstanmen aradaǵy saýda aınalymyn 15 mıllıard dollarǵa deıin arttyrýǵa umtylamyz, – dedi Túrkıa Prezıdenti.
Bul rette Rejep Taııp Erdoǵan túrik kompanıalary Qazaqstan ekonomıkasynyń ártúrli sektorynda tabysty jumys istep jatqanyna toqtaldy. Onyń aıtýynsha, túrik bıznesmenderi Qazaqstandaǵy aýyl sharýashylyǵy salasynyń áleýetin ıgerý, AES salý jáne munaı-gaz tasymaly baǵytynda tájirıbe bólisip, ózara tıimdi seriktestik qurýǵa daıyn.
Budan bólek memleketter basshylary halyqaralyq jáne aımaqtyq kún tártibindegi ózekti máseleler jóninde pikir almasyp, kópjaqty qurylymdar aıasynda bir-birine qoldaý kórsetý jóninde ýaǵdalasty.