Prezıdent Qasym-Jomart Toqaevqa otandyq sport salasyn keshendi reformalaý jóninde buǵan deıin berilgen tapsyrmalarynyń oryndalý barysy baıandaldy, dep habarlaıdy aqshamnews.kz
Memleket basshysyna balalar men jasóspirimder sportyn damytý, tóreshiler men mamandar biliktiligin arttyrý, legıoner sanyn azaıtý, federasıalar jumysyn ońtaılandyrý baǵytynda atqarylǵan jumystar týraly esep berildi.
Erbol Myrzabosynovtyń aıtýynsha, salaǵa vertıkaldy basqarý júıesin engizý sharalary bastaldy. Osy maqsatta mınıstrlik janynan arnaıy qurylǵan top músheleri óńirlerdegi sport salasynyń jaǵdaıyna jan-jaqty taldaý júrgizdi. Budan bólek, qoldanystaǵy «Dene shynyqtyrý jáne sport týraly» Zańǵa negizgi basymdyqtardy aıqyndaıtyn ózgerister men tolyqtyrýlar engizý úshin jumys toby quryldy. Halyqaralyq federasıalarmen yntymaqtastyq aıasyn keńeıtý, sport ınfraqurylymdaryn jetildirý úshin júıeli jumys júrgizilip jatyr.
Sonymen qatar Memleket basshysyna elimizdiń týrısik áleýetin arttyrý sharalary týraly málimet berildi. Mysaly, sheteldik saıahatshylarǵa túrli múmkindikter usynatyn Neo Nomad Visa jobasy iske qosyldy. Prezıdent tapsyrmasyna sáıkes, Almaty taý klasterin, Mańǵystaý jáne Býrabaı kýrorty aımaqtarynda jaǵajaı týrızmin damytý jóninde keshendi jospar ázirlenýde. Oıyn bıznesin jáne lotereıany retteý komıteti qurylyp, lýdomanıaǵa qarsy kúres qolǵa alyndy.
Kezdesý sońynda Qasym-Jomart Toqaev mınıstrge sport jáne týrızm salalaryn odan ári jetildirý jóninde birqatar naqty mindet júktedi. Atap aıtqanda, aldaǵy ýaqytta ótetin halyqaralyq sport dodalaryna daıyndyq deńgeıin pysyqtaýdy, sondaı-aq elimizde tanymaldyǵy artyp kele jatqan padel sportyn ilgeriletýge nazar aýdarýdy tapsyrdy.