Memleket basshysy Básekelestikti qorǵaý jáne damytý agenttiginiń tóraǵasy Marat Omarovty qabyldady
Prezıdentke Agenttiktiń baqylaý fýnksıalaryn oryndaý barysy, onyń ishinde ekonomıkany monopolıadan aryltý jónindegi quqyq qorǵaý organdarymen birlesken jumystary týraly esep berildi, dep habarlaıdy almaty-akshamy.kz
Qasym-Jomart Toqaevqa monopolıaǵa qarsy sharalar aıasynda atqarylǵan jumystar týraly baıandaldy. Oryndalǵan uıǵarymdardyń úlesi 90,3 paıyzǵa jetti.
Sonymen qatar Marat Omarov Agenttiktiń básekelestikti damytý jónindegi 2024 jylǵa arnalǵan jospary jaıynda aıtty.
Agenttik tóraǵasynyń aıtýynsha, búginde básekelestiktiń jaı-kúıin taldaý úshin aqparattyq-saraptamalyq júıe ázirlenip, iske qosylǵan, memlekettik qyzmetter sıfrlandyrylǵan. Básekelestikti qorǵaý jáne damytý agenttiginiń aqparattyq júıesi, ıaǵnı derekter bazasy ázirlenip jatyr. Karteldik sóz baılasý faktilerin anyqtaý maqsatynda jasandy ıntellekt elementteri engiziledi.
Kezdesý sońynda Qasym-Jomart Toqaev Marat Omarovqa ekonomıkanyń negizgi sektorlarynda básekelestikti damytýǵa, vedomstvonyń júrgizip jatqan tekserý jumystaryna, sondaı-aq shaǵyn jáne orta bıznesti qorǵaýǵa ári órkendetýge qatysty birqatar tapsyrma berdi.