Prezıdent Saýd Arabıasy Koróldiginiń Energetıka mınıstri Abdýlazız ben Salman Ál Saýdty qabyldady. Bul týraly almaty-akshamy.kz Aqordanyń baspasóz qyzmeti silteme jasap habarlaıdy.
Kezdesý barysynda Qazaqstan men Saýd Arabıasy arasyndaǵy energetıkalyq jáne ınvestısıalyq yntymaqtastyqty damytý perspektıvalary talqylandy.
Qasym-Jomart Toqaev qazaq-saýd qatynastarynyń buryn-sońdy bolmaǵan deńgeıge jetkenin atap ótip, Saýd Arabıasynyń Taq murageri, Premer-mınıstri Muhammed ben Salman Ál Saýdpen aradaǵy ýaǵdalastyqtar barlyq sektorda ekijaqty yntymaqtastyqqa tyń serpin bergenin eske saldy.
– Sizdiń saparyńyzdy eki memleket arasyndaǵy dostyq pen tyǵyz baılanystardyń aıqyn kórinisi retinde qarastyramyz. Men sizdiń ǵajaıyp elińizge jasaǵan sapardan esten ketpes áser aldym. Sapar, shyn máninde, tabysty boldy. Biz kóptegen másele boıynsha, ásirese, energetıka sekildi mańyzdy salada yntymaqtastyq ornatý týraly ýaǵdalastyqtarǵa qol jetkizdik. Ekijaqty qarym-qatynastyń bolashaǵy jarqyn bolatynyna senimdimin. Ózara yntymaqtastyǵymyz strategıalyq sıpatqa ıe. Osy múmkindikti paıdalana otyryp, Joǵary Mártebeli Muhammed ben Salmanǵa izgi tilegimdi joldaǵym keledi, - dedi Memleket basshysy.
Óz kezeginde Abdýlazız ben Salman Ál Saýd qurmet kórsetkeni úshin Qasym-Jomart Toqaevqa alǵys aıtty.
– Biz Qazaqstanmen aradaǵy tarıhı tamyry tereń qarym-qatynasty joǵary baǵalaımyz. Qazaqstan táýelsizdigin alǵan kezde Saýd Arabıasy kómek qolyn sozǵan alǵashqy elderdiń biri boldy, – dedi mınıstr.
Budan bólek, kezdesýge qatysqan Saýdıanyń ACWA Power kompanıasy dırektorlar keńesiniń tóraǵasy Muhammed Abýnaııan Jetisý oblysynda qýaty 1 GVt bolatyn jel elektr stansıasyn salý jónindegi birlesken ınvestısıalyq jobanyń perspektıvalary, sondaı-aq Qazaqstanmen «jasyl» energetıka salasyndaǵy ózara yqpaldastyq jospary jaıynda aıtty.
Kezdesý sońynda Qazaqstan Respýblıkasynyń Úkimeti men Saýd Arabıasy Koróldiginiń Úkimeti arasynda jel elektr stansıasyn salý jónindegi birlesken jobany iske asyrý týraly kelisimge qol qoıyldy.