Úkimet pen Esep komıteti árbir teńgeniń kózdelgen maqsatqa jumsalýyn qamtamasyz etýi qajet
Memleket basshysy Qasym-Jomart Toqaevtyń tóraǵalyǵymen Reformalar jónindegi joǵary keńestiń kezekti otyrysy ótti, dep habarlaıdy Almaty-akshamy.kz Aqordanyń saıtyna silteme jasap.
Jıyn ulttyq jobalardy ázirleýge qatysty máselelerdi talqylaýdan bastaldy. «Jaıly mektep» jobasy boıynsha Oqý-aǵartý mınıstri Asqat Aımaǵambetov baıandama jasady.
Mınıstrdiń aıtýynsha, jobanyń maqsaty – mektepterdegi oryn tapshylyǵy máselesin júıeli túrde sheshý. Jobanyń júzege asyrylýy 800 myń oqýshyǵa arnalǵan jańa formattaǵy mektepter salýǵa múmkindik beredi. Jańa qolaıly mektepterdiń qazirgi salynyp jatqan mektepterden konseptýaldy artyqshylyǵy mynada: qurylystyń biryńǵaı standarty saqtalady, pán kabınetteri men zerthanalar tolyqtaı jabdyqtalady, 1-4 synyp jáne 5-11 synyp oqýshylary úshin derbes blok bolady, sport zaldarynyń sany oqýshy sanyna qaraı esepteledi jáne 1-4 synyp pen 5-11 synyp oqýshylary úshin bólek ornalastyrylady, ár mektepte qyzdar men uldardy eńbekke baýlýǵa arnalǵan ámbebap sheberhanalar men stýdıalar qarastyrylady. Osy jáne ózge de jańashyldyqtar balalarymyzdyń daǵdylary men qabiletterin jan-jaqty damytýǵa baǵyttalǵan.
Baıandamany tyńdaǵan Prezıdent bilim alý úshin durys jaǵdaı jasaý memlekettiń asa mańyzdy mindeti ekenin atap ótti.
«Ókinishke qaraı, búginge deıin kóp talqylanǵanyna qaramastan, úsh aýysymdy, apatty, eski mektepter máselesi sheshilgen joq. Sondyqtan osy ulttyq jobanyń júzege asyrylýy Úkimettiń de, jergilikti atqarýshy organdardyń da erekshe baqylaýynda bolýǵa tıis. Úkimet pen Esep komıteti árbir teńgeniń kózdelgen maqsatqa jumsalýyn qamtamasyz etýi qajet. Ákimder jyl sońyna deıin jer, ınfraqurylym jónindegi barlyq máseleni sheshýi kerek. Munda esh aqtalýdyń reti joq. Sondyqtan óńir basshylarynyń jeke jaýapkershiligin kúsheıtý jónindegi usynysty qoldaımyn. Qurylysy 2023 jyly bastalýǵa tıis mektepter úshin jer ýchaskelerin bólý jáne ınfraqurylymǵa qosý jónindegi barlyq másele bir aı ishinde sheshilýi kerek. Qalǵandary jyl sońyna deıin. Úkimetke árbir óńirdiń osyndaı mindettemelerin aıqyndap, olardyń oryndalýyn baqylaýdy tapsyramyn», – dedi Memleket basshysy.
Prezıdent ulttyq jobany kelesi jyldan bastap júzege asyrý úshin bıyl barlyq qajetti normatıvtik aktilerdi qabyldaýdy tapsyrdy. Sonymen qatar Qasym-Jomart Toqaev Úkimettiń Samruk-Kazyna Construction-dy biryńǵaı tapsyrys berýshi retinde aıqyndaý týraly usynysyn qoldady. Osy rette Prezıdent búdjetten bólingen qarjynyń jumsalýyn qatań baqylaýǵa alý qajet ekenin aıtty.
Memleket basshysy balalardyń oqýlyqqa toly úlken ári aýyr rúkzaktardy arqalap júrýge májbúr bolýyna baılanysty ata-analardyń shaǵymdaryna arnaıy toqtaldy. Bul balalardyń densaýlyǵyna zıan keltiretini anyq.
Asqat Aımaǵambetov problemalardy sheshýge baǵyttalǵan sharalar týraly baıandady. Onyń aıtýynsha, sıfrlyq oqýlyqqa kezeń-kezeńimen kóshý isi júzege asyrylyp jatyr, sondaı-aq jańa mektepter oqýshylardyń jeke zattaryn, aýystyratyn aıaq kıimderi men oqýlyqtaryn saqtaıtyn jeke shkaftarmen jabdyqtalady.
«Aýyldyq jerdegi densaýlyq saqtaý salasyn jańǵyrtý» atty ekinshi jobany Densaýlyq saqtaý mınıstri Ajar Ǵınıat tanystyrdy. Onyń aıtýynsha, joba barlyq aýyldyq eldi mekenderdi medısınalyq ınfraqurylymmen qamtamasyz etýge jáne zamanaýı kópbeıindi ortalyq aýdanaralyq aýrýhanalar jelisin uıymdastyrýǵa baǵyttalǵan. Ákimdiktermen birlesip 655 nysannyń, onyń ishinde 253 medpýnkt, 160 dárigerlik ambýlatorıa jáne 242 feldsherlik-akýsherlik pýnkttiń qurylysy boıynsha daıyndyq jumystary bastaldy. Jobany iske asyrý medısınalyq kómektiń qoljetimdiligin arttyrýǵa, aýyl halqyna jedel medısınalyq kómek kórsetýdi qamtamasyz etýge, qan aınalymy júıesi aýrýlary saldarynan ólim-jitimdi 20 paıyzǵa tómendetýge, ómir súrý uzaqtyǵyn arttyrýǵa múmkindik beredi.
Prezıdent aýyl halqynyń 100 paıyzyn sapaly alǵashqy medısınalyq kómekpen qamtamasyz etýdi kózdeıtin jobanyń áleýmettik mańyzy zor ekenin atap ótti.
«Bul – memleket retinde bizdiń mindetimiz. Alaıda bul atqarylatyn barlyq jumystyń eń az bóligi. Sondyqtan jobanyń ekinshi komponenti – aýyr dertke shaldyqqandarǵa jáne jaraqat alǵandarǵa sapaly kómek kórsetý ýaqytyn qysqartýǵa múmkindik beretin kópbeıindi aýrýhanalardyń qurylysyna qatysty másele de mańyzdy. «Altyn saǵat» qaǵıdasyn beker ustanbaıdy – naýqasty jabdyqtalǵan aýrýhanaǵa neǵurlym tez jetkizse, onyń ómirin saqtap qalýǵa soǵyrlym múmkindik mol. Bul bastama qanaınalym júıesiniń aýrýy saldarynan adam shyǵynyn azaıtýǵa aıryqsha tıimdi áser etedi dep úmittenemiz. Elimizdegi azamattardyń 35 paıyzy osy aýrýdan kóz jumady. Qazaqstanda EYDU elderimen salystyrǵanda, ınsýlt pen ınfarkttan 2 ese kóp qaıtys bolady. Tipti, jastarymyz da kóz jumyp jatyr. Sońǵy úlgidegi tehnıkamen jabdyqtalǵan kópbeıindi aýrýhanalar jelisi – bul ult saýlyǵyna qosylǵan zor úles ári tıimdi sheshim», – dedi Qasym-Jomart Toqaev.
Memleket basshysy onkologıalyq aýrýlardyń aldyn alý jáne emdeý máselelerin erekshe baqylaýǵa alýdy tapsyrdy.
Prezıdent ulttyq jobalardyń naqty nátıjelerine qol jetkizýdiń mańyzdylyǵyn erekshe atap ótip, olardyń iske asyrylýyna monıtorıń júıesin qamtamasyz etýdi tapsyrdy.
Sondaı-aq otyrysta Qazaqstan Respýblıkasynyń 2060 jylǵa deıin kómirtegi beıtaraptyǵyna qol jetkizý týraly másele qarastyryldy.