9 mamyrda Qazaqstan prezıdenti Qasym-Jomart Toqaev qazaqstandyqtardy Jeńis kúnimen quttyqtady, dep habarlaıdy Aqshamnews.kz tilshisi Aqordaǵa silteme jasap.
Memleket basshysy quttyqtaý sózinde atalmysh datanyń úlken qaıǵy-qasiretpen jetkenin eske saldy.
"Sizderdi Uly Jeńistiń 80 jyldyǵymen shyn júrekten quttyqtaımyn. Osy mereıli kúndi elimizdiń árbir azamaty erekshe kóńil-kúımen qarsy alyp, Jeńimpaz aǵa býynǵa sheksiz rızashylyǵyn bildiredi. Fashızmge qarsy surapyl soǵys halqymyzǵa orasan zor qaıǵy-qasiret ákeldi. Bizdiń qaharman jaýyngerlerimiz asqan erlik pen batyldyq tanytyp, azattyq pen ádildik jolynda aıanbaı kúresti. Júz myńdaǵan sarbazymyz urys dalasynda qaza tapty. Tyldaǵy jurt ta adam aıtqysyz qıyndyqqa qaramastan tynymsyz ter tógip, Jeńisti jaqyndatýǵa ólsheýsiz úles qosty. Olar egis alqabynda, zaýyttar men fabrıkalarda kún-tún demeı jumys istep, maıdandy qamtamasyz etti" dedi Prezıdent.
Sondaı-aq ol ardagerlerge qoldaý kórsetý kerektigin, olardyń erligi máńgi umytylmaıtynyn tilge tıek etti.
"Biz otandastarymyzdyń qaıtpas qaısarlyǵy men qajyrly eńbegin eshqashan umytpaımyz. Janqıarlyq pen erliktiń ozyq úlgisin kórsetken batyrlarymyzdyń esimin árdaıym ulyqtaımyz. Ardagerlerimizge qamqorlyq jasap, qoldaý bildiremiz" dedi ol.
Elimizde 500-ge jýyq kóshe Jeńis qaharmandarynyń qurmetine atalatyn bolady. Bul týraly Qasym-Jomart Toqaev quttyqtaý sózinde aıtty.
"Qazaqstanda Jeńis kúnine oraı kóptegen is-shara ótkizilip jatyr. Elimiz boıynsha bes júzge jýyq kósheni qaharman erlerimizdiń atymen ataý týraly sheshim qabyldandy. Aýqymdy áskerı sherý ótti. Munyń bári zulmat soǵystyń zardabyn halqymyz eshqashan jadynan shyǵarmaýy úshin qajet" dedi ol.
Sonymen qatar memleket basshysy búgingi datanyń mańyzyn, qundylyǵyn erekshe atap ótti.
"Biz Jeńis kúninde beıbit ómirdiń qadirin uǵynyp, dostyq pen tynyshtyqtyń mańyzdylyǵyn tereń túsinemiz. Osy myzǵymas qundylyqtar árdaıym halqymyzdyń ál-aýqatyn arttyrýdyń jáne Qazaqstandy turaqty damytýdyń berik negizi bolyp qala beredi. Men buǵan kámil senemin. Qadirli ardagerlerimizge jáne barsha otandastarymyzǵa zor densaýlyq, baq-bereke tileımin!" dep túıindedi quttyqtaý sózin Prezıdent.