Ázerbaıjan astanasynda Qazaqstan Respýblıkasy Elshiliginiń uıymdastyrýymen Otan qorǵaýshy kúnine arnalǵan saltanatty qabyldaý ótti. İs-sharaǵa dıplomatıalyq korpýstyń, Ázerbaıjannyń áskerı basshylyǵynyń, zıaly qaýym men sarapshylar qaýymdastyǵynyń ókilderi, sondaı-aq Ázerbaıjanda turatyn otandastar qatysty.
Qabyldaý 7 mamyr — Qazaqstan Respýblıkasy Qarýly Kúshteriniń qurylǵan kúnine oraılastyryldy. Bul kún jaýyngerlik batyldyq, otansúıgishtik pen Otandy qorǵaý sımvolyna aınaldy.
Qazaqstannyń Ázerbaıjandaǵy Elshisi Álim Baıel quttyqtaý sózinde eki memleket arasyndaǵy qatynastar barlyq baǵyttar boıynsha qarqyndy damyp kele jatqanyn atap ótti. «Qazaqstan men Ázerbaıjan — strategıalyq seriktester men odaqtastar. Yntymaqtastyǵymyzdyń saıası jáne qorǵanys salalarynda tereńdeı túskeni qýantady. Halyqtarymyz arasyndaǵy baýyrlastyq baılanystary bolashaqta tek nyǵaıa túsetinine senimdimin», - dedi dıplomat.
Á. Baıel sońǵy kezeńde eki el qorǵanys vedomstvolary birlesken is-sharalar sanynyń edáýir óskenin atap ótti. Máselen, 2023 jyly «Hazrı» birlesken áskerı-teńiz jattyǵýlary, al 2024 jyly «Birlestik» jáne «Altyn Qyran» birlesken ekijaqty oqý jattyǵýlary ótkizildi. Sondaı-aq, Elshi qatysýshylarǵa Qazaqstan bitimgerleriniń jetistikteri týraly aıtyp berdi. Onyń aıtýynsha, 2024 jyly BUU-nyń Golan bıiktikterindegi mısıasy quramynda Qazaqstan kontıngentiniń derbes ornalastyrylýy Qazaqstan bitimgerleri daıyndyǵynyń joǵary deńgeıiniń aıǵaǵy boldy.
Ázerbaıjandaǵy Qazaqstannyń áskerı attashesi Raýan Kemalı Qazaqstan Qarýly Kúshterin jańǵyrtý jáne zamanaýı áskerı tehnıkamen jabdyqtaý jóninde aıtyp berdi.
İs-sharanyń qurmetti qonaǵy Ázerbaıjan Respýblıkasy Áskerı-teńiz kúshteriniń qolbasshysy, 1-dárejeli kapıtan Shahın Mamedov boldy. Ol eki el arasyndaǵy áskerı-tehnıkalyq yntymaqtastyq deńgeıin joǵary baǵalap, qazaq áriptesterine senimdi seriktestik úshin alǵysyn bildirdi.
Qabyldaý aıasynda qonaqtarǵa Qazaqstan armıasynyń tarıhy men zamanaýı kelbetine arnalǵan mýltımedıalyq ekspozısıa usynyldy. Sondaı-aq, is-sharaǵa qatysýshylar ulttyq taǵamdardan dám tatyp, konserttik baǵdarlamany tamashalady.
Jas urpaqqa erekshe kóńil bólindi: is-shara ulttyq sanany qalyptastyrýdaǵy armıanyń rólin kórsetetin patrıottyq prezentasıalarmen súıemeldendi.
Qazaqstannan tys jerlerde Otan qorǵaýshylar kúnin merekeleý mádenı baılanystar men dıasporamen qarym-qatynastardy nyǵaıtýǵa ǵana emes, sonymen qatar elimizdiń jahandyq qaýipsizdiktiń senimdi seriktesi jáne belsendi qatysýshysy retinde halyqaralyq arenada oń ımıjin qalyptastyrýǵa yqpal etedi.