Qasym-Jomart Toqaev beıneúndeýinde jıynǵa qatysýshylardy Qazaqstan qarjygerleri kongresiniń ashylýymen quttyqtap, bul elimiz úshin aıryqsha mańyzdy oqıǵa ekenin atap ótti dep habarlaıdy almaty-akshamy.kz
– Bıylǵy basqosý Ulttyq valúta kúni jáne Táýelsizdigimizdiń 30 jyldyǵy qarsańynda ótip jatyr. Munyń sımvoldyq máni zor. Óıtkeni tól teńgemiz – Eldigimiz ben Egemendigimizdiń shynaıy belgisi. Biz toqsanynshy jyldardyń basynda negizgi naryqtyq reformalardy júzege asyrdyq. Qarjy qatynastaryn keshendi túrde qaıta qarap, jańǵyrttyq. Álemdegi ozyq tájirıbeni eskere otyryp, bank salasyna túbegeıli ózgerister engizdik. Elimizdiń tolyqqandy qarjylyq ınfraqurylymy jasaldy. Sonyń nátıjesinde qor jınap, ony tıimdi jumsaýǵa múmkindik týdy. Sondaı-aq aýqymdy ınvestısıaǵa jol ashyldy, – dedi Memleket basshysy.
Prezıdenttiń aıtýynsha, biz syndarly memlekettik saıasattyń arqasynda básekege qabiletti qarjy sektoryn qalyptastyrdyq.
– Qazaqstannyń qarjy salasy óńirdegi eń ozyq júıe sanalady. Búginde onyń jıyntyq aktıvi 35 trıllıon teńgeden asady. Bul – elimizdiń ishki jalpy óniminiń teń jartysynan kóp, – dedi Qasym-Jomart Toqaev.
Memleket basshysy ótken jyldyń basynda koronavırýs pandemıasy jáne onyń saldary álem ekonomıkasyna orasan zor zıan keltiretinin eshkim kútpegenin atap ótti. Sondaı-aq naryqtardyń quldyraýy keıingi júz jylda bolǵan eń aıtýly oqıǵanyń biri ekenin aıtty.
– Memlekettik jáne halyqaralyq ınstıtýttardyń qabyldaǵan teńdessiz sharalary jaǵdaıdyń odan ári shıelenisip ketýine jol bermedi. Alaıda, shıkizat, saýda jáne qarjy salalaryndaǵy ahýal áli de qubylmaly bolyp tur. Jahandyq syn-qaterler men úrdisterdi eskere otyryp, qarjy salasyn odan ári damytý – memlekettiń basym baǵyttarynyń biri. Bul rette eldiń ekonomıkalyq ósimin qoldaý onyń negizgi mindeti bolyp qala beredi. Memleket qıyn kezeńderde otandyq qarjy sektoryn únemi qoldady. Sonyń arqasynda búginde bankterdiń jumysy turaqty ári ekonomıkany nesıelendiretin áleýeti joǵary. Sondyqtan olar ekonomıkany jyldam qalpyna keltirýde jáne ony odan ári ártaraptandyrýda negizgi ról atqarýǵa mindetti, – dedi Prezıdent.
Qasym-Jomart Toqaev otandyq qor naryǵyn, sonyń ishinde ekonomıkany qarjylandyrýdyń taǵy bir mańyzdy kózine aınalýy qajet «Astana» halyqaralyq qarjy ortalyǵyn belsendi damytý kerek ekenin atap ótti. Memleket basshysynyń paıymdaýynsha, qazirgi kezeńde jahandyq qarjy ınstıtýttarynyń qarqyndy damýyna, kórsetiletin qarjylyq qyzmetterdi barynsha sıfrlandyrýǵa baılanysty mindetterdi de eskerý qajet.
– Bul máseleler baıypty talqylaýdy jáne teńgerimdi sheshimderdi izdestirýdi qajet etedi. Osy baǵyttardyń dáıekti damýy elimizdiń básekege qabilettiligin arttyrýǵa qosymsha jol ashady. Túptep kelgende, halqymyzdyń ál-aýqatyn arttyrý – memlekettik organdardyń, qarjy ınstıtýttarynyń aldyndaǵy ortaq mindet, – dedi Memleket basshysy.
Qazaqstan Prezıdenti atalǵan jıyn elimizdiń qarjy salasyn nyǵaıta túsý úshin tıimdi sharalar ázirleýge septigin tıgizetinine senetinin jetkizdi. Beıneúndeý sońynda qarjy júıesiniń qyzmetkerlerin taǵy da kásibı merekesimen quttyqtap, kongres jumysyna tabys tiledi.