Qurmetti partıalastar!
Eń aldymen, barshańyzdy búgingi Alǵys aıtý kúnimen quttyqtaımyn!
Bul – ózara tilektestikti, janashyrlyqty, qamqorlyqty dáripteıtin meıram. Biz osyndaı yntymaqtyń arqasynda qańtardaǵy qıyn-qystaý kúnderde memlekettigimiz ben tutastyǵymyzdy qorǵap qaldyq. Syn saǵatta birligin saqtaı bilgen barsha otandastarymyzǵa zor rızashylyq bildiremin. Uıymdy jańǵyrtý týraly alqaly jıynnyń dál búgin ótýiniń sımvoldyq máni bar.
Birinshi naýryz – partıanyń qurylǵan kúni. 23 jyl buryn elimizdegi eń basty saıası uıymnyń negizi qalandy. Partıa halyqty ortaq maqsatqa jumyldyrdy. Qoǵamǵa paıdaly kóptegen bastamalar kóterip, saılaýshylardyń qoldaýyna ıe boldy.
Qazir búkil álemdegi ahýal ózgerip jatyr. Jańa qundylyqtarmen qatar kúrdeli syn-qaterler paıda bolýda. Osyndaı aýmaly-tókpeli ýaqytta elimiz damýdyń kelesi kezeńine qadam basty. Biz «Jańa Qazaqstandy» qurýǵa kiristik. Bul – óte aýqymdy mindet. Tipti, bolashaqtaǵy taǵdyrymyzdy sheshetin asa mańyzdy jumys deýge bolady. Ony oıdaǵydaı júzege asyrý úshin jańa maqsat-mindetterimizdi aıqyndap alýymyz qajet.
Partıa barlyq reformaǵa uıytqy bolýǵa tıis. Ol úshin ózgeristi aldymen ózimizden bastaýymyz kerek. Sondyqtan búgingi kún tártibindegi negizgi másele – partıany jańǵyrtý.
Zaman, qoǵam, adam ózgerip jatqanda, partıanyń ózgerýi – zańdylyq. Bul – ýaqyt talaby. Osyǵan oraı jańa ǵana aıtylǵandaı, saıası uıymnyń ataýyn Amanat dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym.
Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qıanat jasamaǵan. Partıa bul qaǵıdatty berik ustanady.
Sondyqtan men partıamyzdy resmı túrde Amanat dep ataýdy tolyq qoldaımyn.
Men 16 naýryzda saıası reformalardyń jańa baǵdarlamasyn usynamyn. Qazir partıalar arasynda báseke kúsheıe túsýde. Osy oraıda biz partıamyzdyń basty saıası kúsh retindegi rólin saqtaýymyz qajet. Bul – óte mańyzdy mindet. Basqasha aıtqanda, uıym árdaıym el múddesin qorǵaıtyn naǵyz halyqtyq partıa bolyp qalýy kerek.
Damýdyń jańa kezeńinde partıaǵa jańa tuǵyrnama qajet. Biraq, negizgi qundylyqtarymyz ózgermeýge tıis. Ortalyq apparatqa jumys tobyn quryp, partıanyń jańa tuǵyrnamasyn ázirleýdi tapsyramyn. Ony partıa ishinde muqıat talqylap, kelesi sıeze bekitemiz.
Osy oraıda, partıa óz jumysyn jandandyryp, uıymnyń rólin kúsheıte túskeni jón.
Jyldar boıy únsiz bolǵan, saıasatpen aınalysyp júrgen keıbir adamdar qazirgi «jylymyqty» paıdalanyp, áleýmettik jelige jappaı shyǵa bastady. Olar aqparattyq keńistikti jaılap aldy deýge bolady. Neshe túrli qaýesetter, jalǵan aqparat tarap jatyr. Mundaı ahýal eldi adastyrýy múmkin. Ashyǵyn aıtsaq, bizdiń josparlarymyzdy, qolǵa alyp jatqan is-sharalarymyzdy kópshilik bile bermeıdi. Partıa belsendileri zamanaýı aqparat quraldaryn paıdalanyp, saıasatymyzdy jurtqa jan-jaqty túsindirýi qajet.
Men úshin eń basty qundylyq – Qazaqstannyń Táýelsizdigi. Memleket basshysy retinde elimizdiń qaýipsizdigi men halqymyzdyń amandyǵyn qamtamasyz etý úshin qoldan kelgenniń bárin jasaımyn. Jaýapkershilik júgi qanshama aýyr bolsa da, odan esh qaımyqpaımyn.
Búgin partıamyzdyń baǵyt-baǵdaryn aıqyndadyq. Endi bilek sybana jumys isteýimiz kerek. Halyq naqty ózgeristerdi kútip otyr.
Partıa atyna zaty saı bolýǵa tıis. El birligin nyǵaıtyp, Jańa Qazaqstandy qurý – bárimizge ortaq mindet. Osy mindetti abyroımen atqarsaq, bolashaǵymyz da baıandy bolmaq. Partıanyń árbir múshesi bul jaýapkershilikti tereń sezinip, aıanbaı eńbek etedi dep senemin.
«Bereke basy – birlik» ekenin árdaıym este saqtaıyq! Jańa Qazaqstandy birge quraıyq!
Elimiz aman, jurtymyz tynysh bolsyn!
Partıamyzdyń jańa ataýy qutty bolsyn!