Prezıdent Memlekettik rámizderdiń 30 jyldyǵyna arnalǵan Memlekettik tý kóterý saltanatty rásimine qatysty, dep habarlaıdy Almaty-akshamy.kz Inform.kz-ke silteme jasap.
Qasym-Jomart Toqaev jıynǵa qatysýshylardy Memlekettik rámizder kúnimen quttyqtap, bul kúnniń egemen elimiz úshin aıryqsha mereıli ári mańyzdy ekenin atap ótti. Onyń aıtýynsha, qasterli Táýelsizdigimizdiń rámizderi qabyldanǵanyna dál búgin 30 jyl tolyp otyr.
– Qasıetti nyshandarymyzda qazaqtyń myń jyldyq arman-tilegi, maqsat-muraty túgel toǵysqan. Tý halqymyz úshin qashanda erlik pen eldiktiń sımvoly sanalǵan. Kók túrikter zamanynda babalarymyz bórili baıraqtyń tóńiregine toptasty. Qazaq handyǵynyń týy búkil ultty uıystyrdy, el birligin bekemdedi. Al, ótken ǵasyrda arystarymyz «Alash týy astynda, Kún sóngenshe sónbeımiz!» dep halyqqa jiger berdi. Kóne dáýirden mıras bolǵan osy dástúr urpaqtan urpaqqa jalǵasyp, búgingi kúnge jetti. Qazaq eliniń kóginde Uly dalanyń aıbynyn asyrǵan Táýelsizdik týy jelbiredi. Kók baıraǵymyz – myzǵymas memlekettiliktiń belgisi. Eltańbamyz – azattyqtyń aıshyqty kórinisi. Al, Ánuranymyz – erkindik pen eldiktiń úni. Táýelsizdiktiń osy úsh sımvoly halqymyzǵa erekshe rýh beredi. Árqaısymyzdyń keýdemizge maqtanysh uıalatady. Óıtkeni, bul – babalarymyzdyń oryndalǵan armany, – dedi Qasym-Jomart Toqaev.
Prezıdent elimizdiń basty qundylyqtaryn qurmetteý – bárimizdiń perzenttik paryzymyz ekenine nazar aýdaryp, oǵan nemquraıly qaraıtyndarǵa, qadir-qasıetin túsiretinderge birjola tosqaýyl qoıý qajettigin aıtty.
– Memlekettik rámizderdi paıdalaný tártibi jónindegi zańnamany kúsheıtý mańyzdy. Sonymen birge, jastarmen jan-jaqty túsindirý jumysyn júrgizgen jón. Bul – búkil qoǵamnyń mindeti. Osy oraıda, búgingi saltanatty is-sharanyń tárbıelik máni óte zor. Tý kóterý – asa mańyzdy oqıǵalarǵa oraı jasalatyn erekshe rásim. Halqymyz tarıhı tańdaýyn jasaıtyn sátte alyp baıraǵymyzdyń kókte jelbireýin jaqsy yrymǵa balaımyz, – dedi Memleket basshysy.
Qasym-Jomart Toqaev saltanatty jıynda sóılegen sózinde memlekettik rámizder eldigimizdiń jarqyn kórinisi, halqymyzdyń maqtanyshy jáne abyroıy ekenin atap ótti. Onyń pikirinshe, Qazaqstannyń Týy, Eltańbasy men Ánurany ultymyzdyń azattyqqa, órkendeýge jáne jasampazdyqqa degen tabandy umtylysyn bildiredi. Sonymen qatar barshamyzdy myzǵymas birlikke uıystyryp, árbir azamatty Otan úshin kúndelikti qajyrly eńbek etýge jáne úlken jetistikterge úndeıdi.
– Kók týymyzdy saltanatty túrde kóterip, ata-babamyzdyń dańqty dástúrin jalǵastyramyz. Jelbiregen týymyz Táýelsizdik murattaryna adal bolýǵa shaqyryp, erekshe jiger beredi. Jahandyq ekonomıkada órship kele jatqan syn-qaterler men buryn-sońdy bolmaǵan geosaıası shıelenis jaǵdaıynda biz memlekettiligimizdi nyǵaıtý úshin kúsh-qýatymyzdy eseleı túsýimiz kerek. Memlekettik rámizderimizdi mazaq etýge, qorlaýǵa eshqashan jol bermeýimiz qajet. Mundaı áreketterge barǵandardy qatań jazalaǵan jón. Birtutas halyq retinde uıysa otyryp, biz kez kelgen qıyndyqty birge jeńip, ádiletti, tıimdi memleket qura alamyz, – dedi Prezıdent.
Qasym-Jomart Toqaev sózin qorytyndylaı kele, bas baıraǵymyzdy kótergen sátte eń úzdik kýrsanttarǵa áskerı shen tapsyrý ıgi dástúrge aınalǵanyn atap ótti.
– Sizder Qarýly Kúshterimizdiń 30 jyldyǵynda ofıser atanǵaly tursyzdar. Bul – úlken abyroı, zor jaýapkershilik. Sondyqtan osy mártebege laıyq bolyp, kópshilikke úlgi-ónege kórsetýlerińiz kerek. Týǵan eldiń tynyshtyǵy men tutastyǵyn qorǵaý – ár azamattyń qasıetti boryshy. Táýelsizdik týyn bıik ustaý – Otan kúzetinde turǵan árbir ulannyń abyroıly mindeti. Erlik ister osyndaı patrıottyq sezimnen bastaý alady. Sizder el úmitin aqtaısyzdar dep senemin. Áskerı shenderińiz qutty bolsyn! Elimiz aman, jurtymyz tynysh bolsyn! Kók baıraǵymyz árdaıym bıikte jelbiresin! – dedi Memleket basshysy.
Saltanatty rásim barysynda joǵary áskerı oqý ornynyń 12 úzdik túlegi Qazaqstan Prezıdenti – Qazaqstan Respýblıkasynyń Joǵarǵy Bas qolbasshysynyń qolynan ofıser pogonyn aldy. Tý kóterý rásimine Parlament Senatynyń tóraǵasy Máýlen Áshimbaev, Parlament Májilisiniń tóraǵasy Erlan Qoshanov, Premer-mınıstr Álıhan Smaıylov, Memlekettik hatshy Erlan Qarın, Prezıdent Ákimshiliginiń Basshysy Murat Nurtileý, memlekettik organdar basshylary, Úkimet músheleri, Parlament depýtattary, Memlekettik rámizder men vedimistik jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komısıa músheleri, joǵary áskerı oqý oryndarynyń kýrsanttary men olardyń týystary qatysty.