Memleket basshysy Qarjylyq monıtorıń agenttiginiń tóraǵasy Janat Elımanovty qabyldady, dep habarlaıdy Almaty-akshamy.kz Aqordaǵa silteme jasap.
Janat Elımanov ózara baǵalaýdyń FATF (aqshany jylystatýǵa qarsy kúrestiń qarjylyq sharalaryn ázirleý toptary) standarttaryna saı sátti ótkeni jóninde málimdedi.
Qazaqstan aqshany jylystatýǵa qarsy kúres jónindegi Azıa-Tynyq muhıty tobynda baqylaýshy mártebesine ıe boldy. Úkimet Kóleńkeli ekonomıkaǵa qarsy is-qımyl jónindegi 2023-2025 jyldarǵa arnalǵan keshendi jospardy bekitkenin aıtty.
Agenttik qyzmetiniń nátıjesinde jyl basynan beri 94 mıllıard teńge shyǵyn ótelip, aktıvter qaıtaryldy, 5 qylmystyq top joıyldy (taǵy 3 is júrgizilip jatyr). Azamattardyń densaýlyǵyn qorǵaý maqsatynda sýrrogat alkogól óndiretin 12 sehtyń qyzmeti toqtatylyp, elimizge quny 5,3 mıllıard teńge bolatyn elektrondy temeki ákelýge jol berilmegen.
Zańsyz oıyn bıznesine qarsy is-áreketter nátıjesinde 11 jasyryn kazıno jáne 2 býkmekerlik keńse taratylǵan, azamattardy alaıaqtyq iske tartýǵa jol bermeý úshin 22 qarjy pıramıdasynyń qyzmeti toqtatylyp, salymshylarǵa keltirilgen 1,9 mıllıard teńge shyǵyn ótelgen. Qarjy pıramıdalaryn jarnamalaıtyn 5,3 myńnan astam saıt pen akkaýnt buǵattalǵan. 14 oblysta áleýmettik mańyzy bar azyq-túlik ónimderiniń 14 túri boıynsha baǵa tómendetilgen.
Qasym-Jomart Toqaev bıznesti qorǵaýǵa, sondaı-aq shetelge zańsyz qarajat shyǵarýdyń jáne ulttyq jobalarǵa bólinetin búdjet qarjysyn jymqyrýdyń jolyn kesýge baǵyttalǵan birqatar tapsyrma berdi.