Prezıdentke Ózara baǵalaý kórsetkishiniń ekinshi kezeńin FATF halyqaralyq standarttaryna sáıkestendirýge qatysty Qazaqstannyń daıyndyǵy baıandaldy
Agenttik tóraǵasy Prezıdentke táýekelder boıynsha jasalǵan Ulttyq baǵalaýdyń qorytyndylary jáne FATF-tyń birqatar mańyzdy usynymyn ulttyq zańnamaǵa engizýge múmkindik beretin zań jobasy Parlamenttiń qaraýynda jatqany týraly aıtty, dep habarlaıdy Almaty-akshamy.kz Aqordanyń resmı saıtyna silteme jasap.
Prezıdent qylmystyq jolmen túsken tabystardy jylystatýǵa jáne terorızmdi qarjylandyrýǵa qarsy is-qımyl boıynsha júrgizilip jatqan jumystardy oń baǵalady. Atap aıtqanda, qabyldanǵan sharalar kiristerdi jylystatýǵa qarsy is-qımyldardyń Basel AML Index ındeksi boıynsha álemdik reıtıńtegi Qazaqstannyń ornyn jaqsartty.
Memleket basshysyna elimizdegi kóleńkeli ekonomıkaǵa qarsy kúrestiń qazirgi jaǵdaıy týraly málimet berildi. Sotqa deıingi tergep-tekserý jóninde 490 is qozǵaldy, onyń 28-i jalǵan shot-faktýra jazyp berýmen jáne qylmystyq jol arqyly qolma-qol aqshaǵa aınaldyrýmen aınalysqan tulǵalarǵa qatysty uıymdasqan qylmystyq top qurý derekteri boıynsha júrgizilýde.
Budan bólek, Janat Elımanov Qasym-Jomart Toqaevqa qarjy pıramıdalaryn jabý jóninde júktegen tapsyrmasynyń iske asyrylý barysy týraly baıandady. Jyl basynan beri Qarjylyq monıtorıń agenttigi 15 qarjy pıramıdasynyń qyzmetin toqtatyp, zardap shekkenderge 2,3 mıllıard teńge qaıtaryldy.
Prezıdent Agenttik basshysyna quqyq qorǵaý jáne basqa da múddeli organdarmen birlese otyryp, atalǵan baǵyttaǵy jumystardy jandandyrýdy tapsyrdy. Memleket basshysy azamattardy qarjy pıramıdalaryna tartýǵa jol bermeý úshin sharalar keshenin qabyldaý kerek ekenin aıtty.