Prezıdentke memlekettik qarjynyń negizgi parametrleri, onyń ishinde bıylǵy İ toqsanda jumsalǵan respýblıkalyq búdjet qarajaty týraly esep berildi, dep habarlaıdy almaty-akshamy.kz.
Osy rette 3 aıdyń qorytyndysy boıynsha memlekettik búdjetke 4,5 trıllıon teńgege jýyq kiris kirgen.
Qasym-Jomart Toqaevqa ónimsiz búdjet shyǵyndaryn ońtaılandyrý jumystary jóninde málimet berildi. Mádı Takıevtiń aıtýynsha, júrgizilgen saraptama nátıjesinde bıyl 300 mıllıard teńgeden astam somany qysqartý usynylǵan. Bul qarajat ekonomıkalyq qaıtarymy barynsha joǵary sharalarǵa jumsalady.
Memleket basshysyna búdjetti basqarý tıimdiligin arttyrý baǵytynda qabyldanyp jatqan jumystar týraly baıandaldy. Atalǵan sharalar jańa Búdjet kodeksine engizilgen.
Budan bólek Prezıdentke salyqtyq-kedendik ákimshilendirý isindegi jańa bastamalar tanystyryldy. Mınıstrdiń aıtýynsha, jańa Salyq kodeksiniń jobasynda salyqtyq ákimshilendirýdiń servıstik modeli engizilgen, tekserýler sanyn qysqartý jónindegi normalar qarastyrylǵan, kameralyq baqylaý jáne salyq bereshegin óndirip alý tásilderi ózgertilgen.
Sonymen qatar Qasym-Jomart Toqaevqa Eýrazıalyq ekonomıkalyq odaqtyń úshinshi eldermen kedendik shekarasyndaǵy ınfraqurylymdy jańǵyrtý jumystary jóninde aqparat berildi. Jobanyń júzege asyrylýy ótkizý múmkindigin 6 esege deıin ulǵaıtyp, ótý ýaqytyn 2 ese qysqartýǵa, sondaı-aq taýarlar men kólik quraldaryn tekserý isin táýlik boıy onlaın rejımde baqylaýǵa múmkindik beredi. Barlyq ótkizý pýnktin rekonstrýksıalaý jumystaryn jyl sońyna qaraı aıaqtaý josparlanyp otyr.
Mádı Takıev memlekettik satyp alý júıesin reformalaý jospary jóninde aıtty. Onyń málimetinshe, «Memlekettik satyp alý týraly» jańa Zań jobasynda satyp alý rásimderin jeńildetý jáne búrokratıadan aryltý, qurylys naryǵynda monopolıaǵa jol bermeý, barlyq memlekettik jáne kvazımemlekettik uıymnyń satyp alýlaryn biryńǵaı platformaǵa kóshirý kózdelgen.
Kezdesý sońynda Prezıdent memlekettik qarjynyń jaǵdaıyn jaqsartý, atap aıtqanda, búdjettiń teńgerimdiligin qamtamasyz etý, sondaı-aq salyqtyq jáne kedendik ákimshilendirý salalaryn sıfrlandyrý arqyly jetildirý jóninde birqatar tapsyrma berdi.