Memleket basshysy «Astana» halyqaralyq qarjy ortalyǵynyń basqarýshysy Qaırat Kelimbetovti qabyldady.
Prezıdentke «Astana» halyqaralyq qarjy ortalyǵynyń (AHQO) byltyrǵy atqarǵan jumystarynyń qorytyndysy, sondaı-aq sheteldik ıýrısdıksıadan Qazaqstan Respýblıkasyna kapıtaldy qaıtarý jáne kompanıalardy elimizge qaıta tirkeý jónindegi tapsyrmalardyń oryndalýy týraly esep berildi.
Prezıdent atalǵan úderisterdiń asa mańyzdy ekenine nazar aýdaryp, olardyń júzege asyrylýy Qazaqstanǵa iri aktıvterdiń qaıtarylýyn qamtamasyz etip qana qoımaı, sonymen qatar qarjy ortalyǵynyń aımaqtyq deńgeıdegi básekege qabilettiligin kórsetetinin atap ótti, dep habarlaıdy Almaty-akshamy.kz Aqordanyń resmı saıtyna silteme jasap.
Qaırat Kelimbetovtiń aıtýynsha, qazirgi kezde AHQO-da álemniń 63 elinen 1236 kompanıa tirkelgen. Osy Ortalyq arqyly tartylǵan ınvestısıalardyń jalpy kólemi 6,2 mıllıard dollardy quraıdy. AHQO-nyń Astana International Exchange (AIX) bırjasy arqyly 321 mıllıon dollarǵa jýyq aksıonerlik kapıtal men 1,65 mıllıard dollardy quraıtyn boryshkerlik kapıtal tartylǵan. 18 qazaqstandyq jáne 11 halyqaralyq broker AHQO bırjasynyń saýda jónindegi múshesi sanalady.
Memleket basshysyna AHQO-nyń qarjy qyzmetterin retteý komıtetinen lısenzıa alǵan kompanıalardyń sany byltyr eki ese ósip, 46-ǵa jetkeni týraly málimet berildi. Ótken jyly AFSA ıslam bankine jáne ıslam qarjylandyrý kompanıasyna alǵash ret lısenzıa berdi. Budan bólek AHQO soty jáne Halyqaralyq arbıtraj ortalyǵy birlese otyryp, 1000-nan astam daýly isterdi qaraǵan.