Mańǵystaý oblystyq bilim berý, densaýlyq saqtaý salasyn damytyp, jastarǵa qoldaý kórsetý kerek.
Bul týraly Prezıdent Qasym-Jomart Toqaev óńir jurtshylyǵymen kezdesýde aıtty, dep habarlaıdy Almaty-akshamy.kz QazAqparatqa silteme jasap.
«Qazirgi zamanda ár azamattyń jáne tutas eldiń tabysty bolýyna ilim men bilim mol múmkindik beredi. Sondyqtan, bilim ınfraqurylymyn damytý jáne onyń sapasyn arttyrý elimiz úshin basty basymdyq bolyp otyr.
Eń aldymen, mektepke deıingi tárbıe jáne oqytý isiniń qoljetimdi bolýyna nazar aýdarý qajet. Mańǵystaý oblysynda balabaqsha máselesi tolyq sheshimin tappaǵan. Munda 10 myńǵa jýyq balaǵa oryn jetispeıdi. Bul máseleni sheshý úshin memleket pen jekemenshiktiń seriktestigin tolyq paıdalaný kerek.
Bıyl óńirde 17 jekemenshik balabaqsha ashyldy. Bul jumysty jalǵastyrý qajet», - dedi Memleket basshysy.
Ol aımaqtaǵy orta bilim berý salasyndaǵy jaǵdaıdyń da máz emestigin de jetkizdi. Oblystaǵy 13 myń oqýshyǵa mektepten oryn jetpeı jatyr. Apatty jaǵdaıda turǵan, úsh aýysymmen oqytatyn mektepter bar. «Jaıly mektep» ulttyq jobasy boıynsha Mańǵystaý aımaǵynda aldaǵy úsh jyldyń ishinde 21 mektep salynady.
«Biraq, bul da jetkiliksiz. Oblys ákimdigi úsh jyldyń ishinde úsh aýysymmen oqytatyn mektepterdiń máselesin tolyq sheshýge tıis. Bul jumysta bıznestiń múmkindigin keńinen paıdalanǵan jón. Qajetti tájirıbe bar. Sońǵy eki jylda aımaqta 19 jekemenshik mektep ashylǵan. Oblysta qala men aýyl, Aqtaý men Jańaózen mektepteri arasynda bilim sapasy boıynsha orasan zor alshaqtyq bar. Buǵan jol berýge bolmaıdy.
Bilim deńgeıi ár balanyń tulǵa bolyp qalyptasýyna áser etedi. Al, biz barlyq oqýshyǵa birdeı sapaly bilim berýimiz kerek. Bul – memlekettiń mindeti. Men buǵan basa mán beremin», - dedi Memleket basshysy.