Prezıdentke Májilistiń aǵymdaǵy qyzmeti týraly baıandaldy, dep habarlaıdy Aqshamnews.kz tilshisi Aqordaǵa silteme jasap.
Májilis Tóraǵasy Erlan Qoshanovtyń aıtýynsha, depýtattar Memleket basshysynyń eldi damytý jónindegi Joldaýlary men tapsyrmalaryn ýaqtyly ári sapaly zańnamalyq turǵyda qamtamasyz etýge basa mán berip otyr.
Qazirgi tańda 15 zań qabyldanyp, Senatqa joldandy, Palatanyń qaraýynda 77 zań jobasy bar. Bıylǵy jyldyń aıaǵyna deıin Qurylys jáne Sıfrlyq kodekster, sondaı-aq "Bank qyzmeti týraly" zańdy qabyldaý josparlanǵan. Sonymen birge saılaý, tutynýshylardyń quqyqtaryn qorǵaý, quqyqbuzýshylyqtyń aldyn alý týraly zań jobalary pysyqtalyp jatyr.
Depýtattar jergilikti memlekettik jáne ózin-ózi basqarý týraly zańnamaǵa túzetýler engizýge, sondaı-aq kreatıvti ındýstrıa, ǵylymı zertteý aýmaqtaryn damytý, tarıhı-mádenı mura nysandaryn qorǵaý, baǵbandyq sharýashylyq seriktestikterdi memlekettik qoldaý boıynsha zań jobalaryna bastamashy boldy.
Zań shyǵarý jumysy jurtshylyqtyń, sarapshylardyń jáne BAQ ókilderiniń qatysýymen ashyq júrgizilýde. Barlyq saıası partıalardyń fraksıalary óz elektoratynyń suranysyna sáıkes usynystaryn belsendi túrde engizip jatyr. Mańyzdy zań jobalary Qoǵamdyq palatanyń otyrystarynda qaralady.
Memleket basshysynyń Jasandy ıntellektige qatysty bastamalaryn iske asyrýǵa belsendi atsalysyp kele jatqanyn aıtty. Qyrkúıek aıynyń sońynda Májilis «Jasandy ıntellekt týraly» Zań qabyldap, Senatqa joldady. Sonymen qatar qazaqstandyq jáne sheteldik sarapshylardyń qatysýymen parlamenttik tyńdaý ótkizildi.
Depýtattardyń jáne Energetıka mınıstrliginiń bastamasymen Aqtaýda munaı-gaz salasyndaǵy mashına jasaý isin damytý forýmy ótti. Munaı-gaz sektoryndaǵy satyp alýlarda qazaqstandyq úlesti júıeli túrde arttyrý jaıly sheshim qabyldandy. Depýtattar muny udaıy baqylaýda ustaıdy.
Elimizge Mońǵolıa Uly Memlekettik Hýralynyń jáne Majarstan Memlekettik jınalysynyń tóraǵalary resmı saparmen keldi. Kóptegen eldiń parlamentterimen dostyq toptary belsene qyzmet atqarýda, zań shyǵarý salasynda tájirıbe almasý jolǵa qoıylǵan jáne memleketaralyq jobalardy qoldaý boıynsha jumys júrgizilýde.
Depýtattar UQSHU Parlamenttik Assambleıasy, TúrkPA, TMD Parlamentaralyq assambleıasy jáne basqa da kópjaqty uıymdar aıasynda tabysty qyzmet atqaryp keledi.