Almaty memlekettik bıznes koleji «Jumysshy mamandyqtarynyń jyly» aıasynda, Almaty qalasy Bilim basqarmasynyń qoldaýymen jáne tehnıkalyq jáne kásiptik bilim berý júıesin jańǵyrtý bastamasyn júzege asyrý maqsatynda, bes juldyzdy InterContinental Almaty qonaq úıinde dýaldy oqytý úlgisiniń tabysty nátıjelerin kórsetýge arnalǵan baspasóz týryn ótkizdi.
İs-shara barysynda elimizdegi bedeldi qonaq úılerdiń birinde jumys istep júrgen túlekterdiń tabysqa, jetistikke jetý jolymen tanystyq. Sondaı-aq, olar áıgili Real Madrid fýtbol komandasy men «Qaırat» klýby arasyndaǵy tarıhı mach kezinde atalmysh qonaq úıge túsken sheteldiktermen bolǵan áserli sátterdi bólisti.
"Men kolejdi «Tamaqtandyrýdy uıymdastyrý» mamandyǵy boıynsha oqydym, biliktiligim – aspaz. Dýaldy oqytý baǵdarlamasynyń áseri erekshe. Onda teorıaǵa qaraǵanda tájirıbe kóbirek boldy. Bul – úlken artyqshylyq. Sebebi naqty óndiriste jumys isteý barysynda kásibı sheberligiń shyńdalady. Ujymmen, shef-aspazdarmen birge qoıan-qoltyq eńbek etý úlken mektep. Qazir men joǵary deńgeıli InterContinental Almaty qonaq úıinde aspaz bolyp jumys isteımin jáne ózimdi naǵyz maman retinde sezinemin. Taǵamǵa qosylatyn et, kókónis bolsyn, báriniń qalaı kesilgeni, týralǵanyna deıin mańyzdy. Tipti, tuzdyǵy da artyq ne kem bolmaýǵa tıis. Talǵampaz bolý da mańyzdy. Úzdiksiz jetilýge, bilim alýǵa qushtarlyq ta úlken ról atqarady. Bolashaqta osy kásibimniń shyńyna jetip, naǵyz sheberi bolǵym keledi", – deıdi kolej túlegi, aspaz Denıs Shıfman.
Iá, atalǵan bıznes kolejdiń túlekteri bes jyl qatarynan InterContinental Almaty qonaq úıiniń túrli bólimderinde – ystyq jáne sýyq sehtarda, kondıterlik jáne banket bólimderinde tabysty eńbek etýde. Olardyń qatarynda aspazdar, shef-aspazdar, kondıterler jáne servıs menedjerleri bar.
"Bıyl kolejdi 589 stýdent bitirip shyqty, olardyń 90%-y alǵan mamandyǵy boıynsha jumysqa ornalasty. Bul – jumys berýshilermen júıeli ózara is-qımyldyń jáne praktıkalyq baǵyttaǵy bilim berýdiń naqty nátıjesi. Bizdiń áleýmettik seriktesterimizdiń, sonyń ishinde bes juldyzdy InterContinental Almaty qonaq úıiniń qoldaýynyń arqasynda stýdentter joǵary deńgeıli qyzmet kórsetý salasynda tájirıbe jınaqtap, turaqty jumys ornyn tabýda", – dep atap ótti Almaty memlekettik bıznes kolejiniń dırektory Aınur Muqajanova.
Pres-týr kezinde qonaq úıdegi zamanaýı óndiristik oryndar kórsetilip, onda kolej túlekteri alǵan bilimderi men daǵdylaryn tıimdi qoldanyp júrgenin baıandady. Sondaı-aq, qonaq úı ókilderi jas mamandardy óndiristik ortaǵa beıimdeý, kásibı ósý men tálimgerlik baǵdarlamalary týraly tájirıbelerimen bólisti. Al biz óz kezegimizde eńbek naryǵynda suranysqa ıe bilikti mamandardyń daıarlyǵynyń joǵary deńgeıine jáne dýaldy oqytýdyń tıimdiligine kóz jetkizdik. Almaty qalasyndaǵy tehnıkalyq jáne kásiptik bilim berý júıesin jańǵyrtýdyń naqty nátıjelerimen tolyq tanysyp, kolej ben áleýmettik seriktesterdiń bilikti kadrlardy daıarlaýǵa qosyp otyrǵan úlesiniń zor ekenin baǵamdadyq.
"Aspaz bolýdy mektepte oqyp júrgende armandaǵanmyn. Menińshe, bolashaqta kim bolatynyńdy qatelespeı tańdaı bilý kerek. Sebebi, istegen isiń saǵan qýanysh, lázzat syılasa ǵana jetistikke jetesiń. Osy qaǵıdany bizge kolej dırektorynyń oqý-óndiristik jumys jónindegi orynbasary Uljalǵas Kamalqyzy jáne ózge de ustazdarym ylǵı qaıtalap, sanamyzǵa quıyp otyrady. Men qazir osy qonaq úıde tájirıbeden ótip júrmin. Kóbine suıyq, sorpa taǵamyn, tuzdyqtar ázirleımin. Jalaqy tólenedi. Shákirtaqy da alamyn. Osylaısha adal kásiptiń nany da tátti bolatynyn sezinip júrmiz. Oqyǵanyńdy ispen ushtastyrý múldem basqa nárse, kóp tájirıbe jınap júrmin. Munda ózimizdiń kolejdiń túlegi, ardager-maman Moıseeva Olga Konstantınovnanyń da qamqorlyǵy sheksiz. Úlken ujymmen aralasý, adamı qarym-qatynastyń da ádebin meńgerý – bári-bári bizdiń myqty maman bolyp shyǵýymyzǵa jol ashyp berdi. Bizge tek adal jumys isteý ǵana qalyp tur", – deıdi kolejdiń 2-kýrs stýdenti Ramazan Turǵanbek.
Osy rette aıta ketsek, Almaty memlekettik bıznes koleji elimizdegi salalyq úzdik oqý oryndarynyń biri retinde óz ustanymyn nyq saqtap keledi. Mundaı jetistik – áleýmettik seriktestikke jáne kásibı mamandardy daıarlaýdaǵy ortaq jaýapkershilikke negizdelgen eńbektiń nátıjesi.
InterContinental Almaty – Almaty memlekettik bıznes kolejiniń negizgi áleýmettik seriktesteriniń biri ári qazaqstandyq qonaqjaılylyq ındýstrıasynyń bedeldi ókili. Munda joǵary deńgeıdegi servıs, zamanaýı standarttar jáne halyqaralyq tájirıbe úılesim tapqan. Qonaq úıde mańyzdy iskerlik jáne mádenı is-sharalar ótkiziledi, túrli elderdiń delegasıalary men mártebeli meımandar qabyldanady. Osyndaı seriktespen birlese jumys isteý – kolej stýdentteri úshin kásibı tájirıbe men álemdik deńgeıdegi mamandardan úırenýdiń úlken múmkindigi ekeni sózsiz.