Almatyda tutynýshylardyń quqyqtyq saýattylyǵyn arttyrýǵa baǵyttalǵan áleýmettik joba óz máresine jetti.
Almaty qalasy Qoǵamdyq damý basqarmasynyń qoldaýymen jáne "AMANAT" partıasy janyndaǵy "Jastar Rýhy" jastar qanatynyń uıymdastyrýymen 2025 jyldyń sáýir-qazan aılary aralyǵynda júzege asqan "Tutynýshylardyń quqyǵyn qorǵaý" jobasy tabysty aıaqtaldy.
Joba aıasynda qala jastary men turǵyndarynyń tutynýshylyq mádenıetin qalyptastyrý, zańdyq bilimin arttyrý baǵytynda birqatar keshendi is-sharalar uıymdastyryldy.
12 joǵary oqý ornynda 1000-ǵa jýyq stýdenttiń qatysýymen aqparattyq dárister ótti. Lektor-zańgerler tutynýshylardyń quqyqtaryn qorǵaý tetikteri men zań normalaryn túsindirip, naqty mysaldar arqyly keńes berdi.
Sonymen qatar, 50-den astam saýda ortalyqtary, bazarlar jáne qoǵamdyq oryndarda keń aýqymdy túsindirý aksıalary uıymdastyrylyp, 2000-ǵa jýyq almatylyq qamtyldy. Azamattarǵa sapaly qyzmet pen ádil saýdany talap etý joldary túsindirildi.
Joba sheńberinde arnaıy jedel jeli jumys istep, tutynýshylardan kelip túsken 150-ge jýyq saýalǵa zańgerlik keńes berildi. Buǵan qosa, arnaıy áleýmettik beınerolık ázirlenip, ol halyqqa qyzmet kórsetý ortalyqtarynda jáne oqý oryndarynda kórsetildi.
"Tutynýshylardyń quqyqtyq saýattylyǵyn arttyrý – ádil naryq pen sapaly qyzmettiń basty kepili. Bul baǵyttaǵy jumys aldaǵy ýaqytta da jalǵasyn tabady", – deıdi joba uıymdastyrýshylary.
Qazannyń aıaǵynda jobanyń qorytyndysyna arnalǵan dóńgelek ústel ótkizilip, atqarylǵan jumystar men usynystar boıynsha eseptik aqparat usynylmaq.