Elimizde 200 myńnan astam adam shahmatpen aınalysady.
Memleket basshysy Qasym-Jomart Toqaev Halyqaralyq shahmat federasıasynyń prezıdenti Arkadıı Dvorkovıchti qabyldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Arkadıı Dvorkovıchti Halyqaralyq shahmat federasıasynyń (FIDE) prezıdenti laýazymyna jýyrda qaıta saılanýymen quttyqtady.
Kezdesý barysynda Memleket basshysyna Astanada álemniń 12 myqty shahmatshysynyń basyn qosqan FIDE Gran-prı áıelder serıasynyń birinshi kezeńiniń ótkizilýi týraly málimet berildi. Qasym-Jomart Toqaev osyndaı deńgeıdegi is-sharalardy ótkizý elimizdegi shahmat sportynyń damýyna eleýli úles qosatynyn atap ótti.
«Qazaqstanda shahmat keńinen tanymal, ásirese, balalar men jastar arasynda. Bizde 7 myńnan astam seksıa jumys isteıdi, degenmen bul kórsetkishti keminde eki ese arttyrýǵa tıispiz. Qazir shahmatpen 200 myńnan astam adam aınalysady. Qazaqstandyq shahmatshylar halyqaralyq jarystarda sátti óner kórsetip júr. Biz bul sportty qoldaýǵa basa mán beremiz. Shahmatty damytýdyń Jol kartasy ázirlendi. «Mekteptegi shahmat» aýqymdy jobasyn júzege asyrý josparlap otyr», – dedi Memleket basshysy.
Óz kezeginde Arkadıı Dvorkovıch Qazaqstanda shahmatty jeke qoldaǵany jáne tanymal sportqa aınaldyrǵany úshin Qasym-Jomart Toqaevqa rızashylyǵyn bildirip, FIDE shahmatty mektep baǵdarlamasyna engizý jónindegi halyqaralyq tájirıbesin bólisýge daıyn ekenin jetkizdi.
Sonymen qatar olar Qazaqstan men FIDE arasyndaǵy uzaq merzimdi yntymaqtastyq máseleleri jóninde pikir almasyp, elimizde iri halyqaralyq týrnırler ótkizý perspektıvalaryn talqylady.