Sport ınfraqurylymdarynyń múmkindikterine erekshe nazar aýdaryldy.
Kezdesýde hokeı sportyn damytýdyń jáne keńinen tanytýdyń perspektıvalary, sondaı-aq elimizde iri halyqaralyq týrnırler ótkizý máselesi talqylandy, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Lúk Tardıfke Qazaqstan hokeıiniń jetistikteri, otandyq sportty damytý úshin qabyldanyp jatqan sharalar men sport ınfraqurylymynyń múmkindikteri týraly aıtty.
Memleket basshysy elimizde hokeı sportyna qyzyǵýshylyq artyp kele jatqanyn, balalar men jasóspirimderge arnalǵan hokeı mektepteri men jastar komandalarynyń sany kóbeıgenin atap ótti. Búginde sporttyń osy túrimen 14 myń asa adam shuǵyldanady.
Kezdesý barysynda sport ınfraqurylymdarynyń múmkindikterine erekshe nazar aýdaryldy. Osy rette Prezıdent elimizdiń 2027 jyly álem chempıonatyn ótkizýge joldaǵan ótinimi 2023 jyly mamyrdaǵy daýys berý kezinde qoldaý tapsa, Qazaqstannyń osy sharany uıymdastyrýǵa daıyn ekenin aıtty.
Qasym-Jomart Toqaev Halyqaralyq hokeı federasıasy óz tarıhynda Azıa qurlyǵynda eshqashan joǵary deńgeıdegi chempıonattar ótkizbegenin atap ótti.
Halyqaralyq hokeı federasıasynyń prezıdenti kezdesýge múmkindik bergeni úshin Memleket basshysyna alǵys aıtyp, Qazaqstanda hokeı sportyn damytýǵa kóńil bólinip jatqanyn joǵary baǵalady. Sondaı-aq elimiz halyqaralyq jarystardy óte joǵary deńgeıde ótkizýge qajet barlyq ınfraqurylymǵa ıe ekenin jetkizdi.