Prezıdent Qasym-Jomart Toqaev Danıanyń jańadan taqqa otyrǵan Koroli X Frederıkti quttyqtap, jedelhat joldady, dep habarlaıdy almaty-akshamy.kz
– Sizdiń basshylyǵyńyzben Danıa óziniń ornyqty damýyn, halqynyń ál-aýqatyn eselep, halyqaralyq arenadaǵy bedelin arttyrý jolyndaǵy ıgi isterdi jalǵastyra beretinine kámil senemin. Qazaqstan men Danıa arasyndaǵy dostyq pen ózara qoldaýǵa negizdelgen jan-jaqty yntymaqtastyq birlesken kúsh-jigerimizdiń arqasynda aldaǵy ýaqytta da nyǵaıa túsetinine úmitim zor, – dep jazylǵan jedelhatta.
Sonymen qatar Prezıdent Qasym-Jomart Toqaev Patshaıym laýazymynan merziminen buryn óz erkimen ketip, taq murageri Frederık hanzadany Danıa Koroli retinde jarıalaǵan II Margretege de jedelhat joldady.
Memleket basshysy Qazaqstan men Danıa arasyndaǵy yntymaqtastyqty damytýǵa súbeli úles qosqany úshin II Margretege rızashylyǵyn bildirdi.