Kelesi jyly elimizde iri kadrlyq aýys-túıister bolady.
Úkimettiń keńeıtilgen otyrysyn ótkizgen Prezıdent mınıstrler men ákimderdiń jumysyn synǵa alyp, qatań eskertý jasady. Áleýmettik-ekonomıkalyq salany damytý úshin jeti baǵytty aıqyndap berip, naqty iske kóshý qajettigin eskertti, dep habarlaıdy Almaty-akshamy.kz.
Elde ekonomıka keri ketken, qymbatshylyq qysyp barady. Inflásıa sońǵy 14 jylda bolmaǵan kórsetkish - 19,6 paıyzǵa jetti. Sondyqtan mınıstrler men ákimder bar kúshin halyqtyń ál-aýqatyn jaqsartýǵa jumyldyrýy kerek. Biraq jurttyń bılikten talap etip otyrǵany qurǵaq sóz emes, naqty is,- dedi Memleket basshysy.
«Azamattarymyz naqty oń ózgerister búgin jáne qazir bolady dep úmittenip otyr. Osy úmit pen senimdi aqtaý – aldymyzda turǵan eń basty mindet ári qasterli paryz. Sondyqtan saılaý aldyndaǵy baǵdarlamany júzege asyrý úshin arnaıy jospar qabyldandy. Barlyq is-shara ýaqtyly jáne tolyq oryndalýy kerek. Árbir mınıstrdiń, ákimniń jumysy statısıkamen, esep-qısappen emes, naqty nátıjemen ólshenetin bolady», - dedi Qazaqstan Respýblıkasynyń Prezıdenti Qasym-Jomart Toqaev.
Árıne el ekonomıkasyn arttyrý úshin ınvestısıa saıasatyn qaıta qaraý kerek, - dedi Prezıdent. Óıtkeni bıyl iske asýy tıis 300-ge jýyq iri jobanyń 43-i ǵana júzege asqan. Bul óte tómen kórsetkish. Saldarynan myńdaǵan jumys oryny ashylmaı qaldy. El ekonomıkasy mıllıardtaǵan teńge qarjydan qaǵyldy. Budan bólek Ulttyq bank pen Úkimetke Ulttyq qordy basqarý isin jetildirý tapsyryldy. Óıtkeni qıt etse, osy qordan transfert alýǵa ábden áýestenip alǵan. Sonyń kesirinen tabys 10 jylda nebary 1,6 paıyzǵa ǵana artqan. Jalpy Prezıdenttiń otyrysta júktegen tapsyrmasy kóp. Óńdeý ónerkásibin arttyrý, jer qoınaýyn paıdalaný, aýyl sharýashylyǵy men aýydyq jerlerdi damytýǵa erekshe kóńil bólindi. Qasym-Jomart Toqaevtyń aıtýynsha, kelesi jyl aýyldardy kórkeıtýge baǵyttalmaq. Ol úshin trıllıon teńge bólinbek.
Sondaı-aq Prezıdent aldaǵy jyly kadrlyq aýys-túıister bolatynyn, ásirese, ákim orynbasarlary men vıse-mınıstrler aýysatynyn aıtty. Sondyqtan bastyqtardyń únemi búıregi buryp turatyn adamdarymen qoshtasýyna týra keledi, - dedi Toqaev.