Prezıdent Qasym-Jomart Toqaev Qazan qalasynda ótip jatqan BRIKS-tiń plenarlyq otyrysynyń «BRIKS plús»/«aýtrıch» formatynda sóz sóıledi, dep habarlaıdy aqshamnews.kz.
Memleket basshysy BRIKS ózara tıimdi yntymaqtastyqqa nıetti kóptegen eldiń nazaryn aýdaratyn halyqaralyq aýqymdaǵy jahandyq ortalyqqa aınalyp kele jatqanyn atap ótti.
– BRIKS damý turǵysynan mol áleýetke ıe jáne túrli qurlyqtaǵy memleketterdi biriktiredi. Sondaı-aq yntymaqtastyqty nyǵaıtyp, ortaq resýrstardy barlyq qatysýshynyń ıgiligine tıimdi paıdalanady. Ózara qurmet pen seriktestik, birlese órkendeý qaǵıdattaryna negizdelgen keleshektiń irgesin qalaýǵa BRIKS-tiń tájirıbesi de, múmkindigi de jetedi, – dedi Prezıdent.
Qasym-Jomart Toqaevtyń pikirinshe, BRIKS-tiń kópjaqty kúsh-jigeri álemde áli de balamasy joq ámbebap qurylym sanalatyn BUU qyzmetin tolyqtyra túsedi.
– BUU Jarǵysyndaǵy dıplomatıa men dıalog qaǵıdattary BRIKS-tiń negizgi kún tártibine aınaldy. Ol qaqtyǵystardy beıbit jolmen retteýge jáne strategıalyq turaqtylyqty nyǵaıtýǵa yqpal etip otyr. Biz Eýrazıanyń teń ári birtutas qaýipsizdigin qamtamasyz etýge qatysty Reseıdiń tujyrymdamasyn joǵary baǵalaımyz. Onyń túp negizinde ózara senim men yntymaqtastyqty nyǵaıtý arqyly geosaıası qysymdy tómendetý nıeti jatyr. Qazaqstan Qytaıdyń halyqaralyq turaqtylyqty saqtaý, egemendikti qorǵaý, qaqtyǵystardy beıbit jolmen sheshý jáne kópqyrly tásilderdi qoldaný arqyly jahandyq qaýipsizdikti qamtamasyz etý bastamasyn qoldaıdy. Sondaı-aq elimiz Qytaı men Brazılıanyń Ýkraına jónindegi beıbit josparyn quptaıdy, – dedi Prezıdent.