Bes qabatty zamanaýı ǵımaratta 5-17 jas aralyǵyndaǵy jetkinshikterge arnalǵan 60-tan astam úıirme men sport seksıalary jumys isteıdi.
Olar tehnıkalyq shyǵarmashylyq, sándik-qoldanbaly óner, áleýmettik ǵylymdar, mýzyka jáne horeografıa, sport sekildi birneshe baǵytqa bólingen. Ortalyq bir mezgilde 700 balany qabyldaı alady, dep habarlaıdy almaty-akshamy.kz.
Aýmaǵy 7500 sharshy metr ǵımaratta sońǵy úlgidegi tehnologıalarmen jabdyqtalǵan oqý kabınetteri, júzý baseıni, akt zaly, podkast jáne foto stýdıalary bar.
Memleket basshysy Lego qurastyrý, robotty tehnıka, 3D-modeldeý jáne qysh óneri, urmaly aspaptar, dombyra úıirmesi kabınetteri men júzý baseınin aralap kórdi. Sondaı-aq Prezıdent ortalyqtyń oqytýshylarymen, balalarmen jáne ata-analarmen áńgimelesti.
– Árbir qalada, aýdanda osyndaı ortalyqtar ashylýy kerek. Men jaqynda bıznes ókilderimen kezdesý ótkizdim. Bul balalar úshin, óskeleń urpaq úshin qajet. Sondyqtan biz bul máselege basa mán beremiz, – dedi Qasym-Jomart Toqaev.
«SANA» jańa urpaq ortalyǵyn «Damu Development Group» konsorsıýmy bıznestiń áleýmettik jaýapkershiligi aıasynda salǵan. Kompanıa quryltaıshysy Abzal Saǵymbaev aldaǵy ýaqytta birneshe damytý ortalyqtaryn, áleýmettik, densaýlyq saqtaý nysandaryn salý josparlanyp otyrǵanyn jetkizdi.
Astana qalasynyń ákimi Jeńis Qasymbektiń aıtýynsha, 2029 jylǵa deıin elordada osyndaı 15 oqýshylar saraıy boı kóteredi. Onyń ishinde 5 ortalyqtyń qurylysy jýyq arada bastalady.