Qazaqstan Prezıdenti Nıkol Pashınánǵa rızashylyǵyn bildirdi.
Qasym-Jomart Toqaev Eýrazıalyq úkimetaralyq keńestiń otyrysyna qatysý úshin Qazaqstanǵa kelgen Armenıanyń Premer-Mınıstri Nıkol Pashınánmen kelissóz júrgizdi, dep habarlaıdy Almaty-akshamy.kz Aqordanyń resmı saıtyna silteme jasap.
Kezdesý barysynda olar saýda-ekonomıkalyq baılanystardy, sonyń ishinde Eýrazıalyq ekonomıkalyq odaq aıasyndaǵy yntymaqtastyqty nyǵaıtýǵa basa nazar aýdara otyryp, Qazaqstan men Armenıa arasyndaǵy qatynastardyń damý perspektıvalaryn qarastyrdy. Taraptar halyqaralyq uıymdar aıasyndaǵy ózara is-qımyldar men Ýkraına tóńiregindegi jaǵdaıdy talqylady.
Memleket basshysy Armenıa Premer-Mınıstrine iltıpat bildirip, ekijaqty yntymaqtastyqtyń qarqyndy damyp kele jatqanyn atap ótti.
«Bıyl bizdiń dıplomatıalyq qatynastarymyzdyń ornaǵanyna 30 jyl. Bul – óte mańyzdy data. Eki el arasynda joǵary deńgeılerdegi ashyq saıası dıalog jolǵa qoıylǵan. Parlamenttik, mádenı-gýmanıtarlyq baılanystarymyz damyp keledi», – dedi Prezıdent.
Memleket basshysy Armenıanyń Ujymdyq qaýipsizdik týraly shart uıymyndaǵy tóraǵalyǵyn joǵary baǵalap, qańtardaǵy qaıǵyly oqıǵalar kezinde UQSHU-nyń bitimgerlik kontıngentin Qazaqstanǵa jiberý týraly sheshimdi qoldaǵany úshin Nıkol Pashınánǵa rızashylyǵyn bildirdi.
Óz kezeginde Armenıa Úkimetiniń basshysy qonaqjaılyq kórsetkeni jáne Eýrazıalyq úkimetaralyq keńes otyrysynyń joǵary deńgeıde uıymdastyrylǵany úshin alǵys aıtty.
«Qazaqstanmen aradaǵy qarym-qatynastarymyzdyń tabysty damyp kele jatqanyna qýanyshtymyn. Qazir Eýrazıalyq ekonomıkalyq odaq formatynda ekonomıkalyq yntymaqtastyq pen Eýrazıalyq ekonomıkalyq keńistikti odan ári damytý máselelerin talqylap jatyrmyz», – dedi Nıkol Pashınán.
Sondaı-aq Premer-Mınıstr Nıkol Pashınán UQSHU-nyń daǵdarysqa qarsy áreket etý tetikterin oń baǵalap, Armenıanyń uıymǵa tóraǵalyǵy aıasynda osy máselege basymdyq beriletinin atap ótti.