Almaty qalasynda BUU-nyń Ortalyq Azıa men Aýǵanstan úshin Ornyqty damý maqsaty jónindegi aımaqtyq ortalyǵyn ashý mańyzdy dep esepteımiz. Bul týraly Qazaqstan Prezıdenti Qasym-Jomart Toqaev Birikken Ulttar Uıymy Bas Assambleıasy 77-sessıasynyń jalpy debatynda aıtty, dep habarlaıdy Almaty-akshamy.kz QazAqparatqa silteme jasap.
«Ortalyq Azıa týraly aıtar bolsaq, biz onyń qazirdiń ózinde halyqaralyq yntymaqtastyq úshin mol múmkindikteri bar aımaq ekenin este ustaýymyz kerek. Ortalyq Azıadaǵy áriptesterimizben birge aımaqty odan ári damytý maqsatynda ózara saıası is-áreketti nyǵaıtýǵa jáne ekonomıkalyq baılanystardy tereńdetýge nıettimiz. Biz tatý kórshilik qarym-qatynastardy saqtaýǵa jáne yntymaqtastyqty ártaraptandyrýǵa beıildimiz», - dedi Qasym-Jomart Toqaev.
Memleket basshysy bul turǵyda mańyzdy tabıǵı jáne aýyl sharýashylyǵy resýrstar, adamı kapıtal jáne tranzıttik áleýet eskerilgenin aıtty.
«Biz – Shyǵys pen Batystyń, Ońtústik pen Soltústiktiń arasyndaǵy aralyq naryqpyz. Biz klımattyń ózgerýi, Aral teńizi, sý resýrstaryn utymdy paıdalaný, shekarany delımıtasıalaý, ekstremızmge qarsy kúres jáne aımaqishilik saýdany keńeıtý máselelerin qamtıtyn óńirlik kún tártibindegi máselelerdi sheshý úshin barlyq múddeli taraptarmen birlesken jumystardy jalǵastyrýǵa nıettimiz. Sondyqtan Almaty qalasynda BUU-nyń Ortalyq Azıa men Aýǵanstan úshin Ornyqty damý maqsaty jónindegi aımaqtyq ortalyǵyn ashý mańyzdy dep esepteımiz», - dedi Prezıdent.
Qasym-Jomart Toqaev Qazaqstan Aýǵanstannyń bolashaǵyn kórshi eldermen beıbit qarym-qatynasta bolatyn shynaıy táýelsiz, beıtarap, birtutas, damyǵan memleket retinde kórgisi keletenin atap ótti.
«Sondyqtan asa mańyzdy gýmanıtarlyq kómek kórsete otyryp, osy elde memlekettilik qalyptasýynyń kúrdeli prosesin qoldaımyz», - dedi Memleket basshysy.