Bastaýysh synyp oqýshylaryna beriletin tegin ystyq tamaqtyń sapasyna jóndi qaramaı júrgen mektepter máselesi mınıstrlik deńgeıinde qaralady.
Bul týraly Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıńi jónindegi Parlamenttik komısıa otyrysynda Oqý-aǵartý mınıstri Ǵanı Beısembaev aıtty, dep habarlaıdy Almaty-akshamy.kz QazAqparatqa silteme jasap.
Aıta keteıik, 2023-2024 jylǵy oqý jyldarynda elimizde bastaýysh synypta oqıtyn 1,4 mln bala tegin tamaqtanady. Alaıda oqý jylynyń basynda mektep asqanalarynda balalarǵa arnalǵan tamaqtyń sapasyna qatysty ata-analar shaǵym aıta bastady.
«Elimiz aýmaǵynda ystyq tamaqpen qamtamasyz etý máselesin qadaǵalaý boıynsha tıisti top tekserip jatyr. Barlyq óńirde 1-4 synyp oqýshylaryna tegin ystyq tamaqpen berýge qarajat tolyq bólingen. Biraq qoǵamda onyń sapasyna jáne tolyqtaı qamtýǵa qatysty suraqtar qoıyla bastady. Sondyqtan monıtorıń toby osy kemshilikterdi anyqtap, bul saladaǵy máseleni mınıstrliktiń aparattyq keńesinde qarastyramyz», - dedi Ǵ. Beısembaev «QazAqparat» tilshisiniń suraǵyna jaýap bere otyryp.
Onyń aıtýynsha, monıtorıń tobynyń qadaǵalaý jumystary 10 qazanda aıaqtalady.
«Keıbir aımaqtarda talaptardy oryndamaǵan jekelegen mektepter anyqtalyp jatyr. Bul turǵyda olarǵa naqty sharalar qoldanylady. Jergilikti ákimdikterge mektep asqanalarynyń jumysyn tıisti deńgeıde uıymdastyrý máselesine qatysty hat joldaımyz», - dedi mınıstr.