Elimizdegi orta bilim oshaqtarynda ata-analardan aqsha jınaý deregi azaımaı tur.
Bilim salasyna bólinetin qarjy úsh esege deıin ulǵaıdy. Ol óz kezeginde jemqorlyq qaýip-qaterlerdiń artýyna ákelip soqtyrdy, dep habarlaıdy Almaty-akshamy.kz 24.kz-ke silteme jasap.
Bul týraly Taldyqorǵanda ótken bilim salasyndaǵy jemqorlyqtyń aldyn alýǵa arnalǵan jıynda elimizdiń Sybaılas jemqorlyqqa qarsy is-qımyl agenttigi tóraǵasynyń birinshi orynbasary Dmıtrıı Malahov málimdedi. Oqý-aǵartý mınıstri Ǵanı Beısembaev bolsa mektepte bolǵan mundaı jaǵdaılar úshin sol bilim oshaǵynyń dırektory tikeleı jaýap beretinin aıtty.
«Korrýpsıaǵa qarsy qyzmet sońǵy 3 jylda bilim salasyndaǵy 300-den astam qylmysty tirkedi. 192 adam qylmystyq jaýapkershilikke tartylyp, 140 adam sottaldy. Agenttik tóraǵasy bizdiń aldymyzǵa naqty mindetter qoıdy. Bólingen qarjyny ıgerýmen qosa jalaqy tóleý máselesi de jiti tekseriledi. Kemshilikterdi joıý baǵytynda birlesken sharalar qabyldanyp, elimizdegi barlyq bilim basqarmalarynda korrýpsıalyq qaýipke taldaý jasaý jumystary qolǵa alyndy», - deıdi QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Dmıtrıı Malahov.
«Ózimiz qoıdyra almaǵannan keıin, bul kisiler endi mektepte aqsha jınaıtyn bolsa, ol anyqtalatyn bolsa, 7 mln teńge aıyppul tóleıtin bolady. 5 myń teńge jınaımyn dep erteń dırektor, muǵalim 7 mln aıyppul jáne bas bostandyǵynan aıyrý máselesi týraly qazir aıtyp jatyr. Búkil ujymǵa eskertip qoıyńyzdar. Tıisti qarjy bólinip jatyr. Sondyqtan eshkimnen esh nárse jınaýdyń qajettiligi joq», - deıdi QR Oqý-aǵartý mınıstri Ǵanı Beısembaev.