Qorǵanys mınıstri áıel áskerı qyzmetshilerdi merekemen quttyqtady
Qorǵanys mınıstrliginde vedomstvo basshysy áskerı qyzmetshi áıeldermen kezdesti, dep habarlaıdy Almaty-akshamy.kz.
General-polkovnık Rýslan Jaqsylyqov názik jandylardyń búginde túrli salada eńbek etip júrgen atap ótti. Olardyń jetistikteri men shyqqan bıigi barlyq qazaqstandyqtarǵa jiger berip, yntalandyrady. Uly Otan soǵysy jyldary da osylaı boldy.
– Soǵys – er azamattardyń isi ekeni bárimizge málim. Alaıda 1941-1945 jyldary bolǵan surapyl kezeń talaı batyrlardy tanytty. Syn saǵatta eli úshin qazaq halqynyń dańqty qyzdary Álıa Moldaǵulova, Mánshúk Mámetova, Hıýaz Dospanova jáne basqa da kóptegen áıelder erlermen tize qosyp, Otan qorǵady, – dedi mınıstr.
Áskerı qyzmetshi qyz-kelinshekterdiń armıadaǵy jaýyngerlik ázirliktiń jáne áskerı qyzmettiń bedelin arttyrýdaǵy rólin atap ótip, qorǵanys vedomstvosynyń basshysy adal qyzmeti úshin shyn júrekten alǵys aıtty.
Olardyń qatarynda desantshylar men sportshylar, memlekettik qupıalardy qorǵaý jáne jaýyngerlik daıarlyq jónindegi mamandar, áskerı polıseıler men dárigerler, tehnıkalyq mamandar men baılanysshylar, áskerı psıhologtar men qarjygerler, kadr mamandary men tárbıeshiler bar.
– Búginde olar meıirimdi ana, adal jar jáne úı sharýasyndaǵy tamasha jan ǵana emes, áskerı qyzmetshi áıelder áýe kemelerin de basqarady, teńiz navıgasıalyq mindetterin de oryndaýǵa qatysady, UQSHU men SHYU aıasyndaǵy jattyǵýlarǵa da qatysady, er adamdarmen teń dárejede jaýyngerlik kezekshilik te atqarady, – dep atap ótti general-polkovnık Rýslan Jaqsylyqov.
23366 áskerı bólimi komandıriniń tárbıe jáne ıdeologıalyq jumys jónindegi orynbasary podpolkovnık Janar Ospanova óziniń 1996 jyldan beri Qarýly kúshterde jaýapty laýazymdy qyzmetin atqara júrip, balalaryna qamqor, otbasyndaǵy baq-berekeniń uıytqysy bolýynyń syrymen bólisti.
– Qupıa eshteme joq. Eń bastysy – únemi jınaqy bolý, otbasyndaǵy basty nárse bereke ekenin umytpaý. Sonymen qatar belsendilikti joǵaltpaý dep oılaımyn, – dedi Janar Ospanova.
Qorǵanys vedomstvosynyń basshysy olımpıada chempıony, Qorǵanys mınıstrligi Sport komıtetiniń shtattyq komandalardy daıarlaý ortalyǵy bastyǵynyń orynbasary podpolkovnık Olga Rypakovaǵa zor alǵysyn bildirdi. Bıylǵy jyly ataqty jeńil atlet sporttyq mansabyn aıaqtaǵanyn málimdedi, degenmen onyń baı tájirıbesi men bilimi armıa sportshylaryn daıarlaý isinde suranysqa ıe ekeni anyq.
Qarýly Kúshterdiń ardageri, zapastaǵy polkovnık Mara Raıymova «Astana» óńirlik qolbasshylyǵy qolbasshysynyń orynbasaryna deıin kásibı turǵyda tynymsyz eńbegimen ósti. Onyń ómir joly – árbir áskerı qyzmetshige úlgi bolarlyq.
Kezdesýdiń ár qatysýshysy týraly kóp nárse aıtýǵa bolady. Gvardıa serjanty Nadejda Koldyreva 32363 áskerı bóliminde qyzmet etip, 17 ret parashútpen sekirdi. 35835 áskerı bólimi shtabynyń ofıseri aǵa serjant Tolqyn Bákijanova Armıa halyqaralyq oıyndarynyń «Beıbitshilik jaýyngeri» baıqaýynda Qarýly kúshterdiń namysyn qorǵady. Osy baıqaýda birneshe jyl qatarynan Qazaqstan komandasynyń birinshi oryn alýynda onyń da eren eńbegi bar.
Almaty garnızony baspasóz qyzmetiniń bastyǵy, podpolkovnık Krıstına Novıkovanyń dombyrada kúı tolǵaýy áıelderdiń jan-jaqty talantty ekeniniń taǵy bir dáleli boldy.
Kezdesý sońynda Qorǵanys mınıstri Rýslan Jaqsylyqov joǵary kórsetkishteri men úlgili qyzmeti úshin erekshe kózge túsken áıelderge qurmet gramotalary men medaldar tabys etti.
Birqatar áskerı qyzmetshilerge merziminen buryn áskerı ataqtar berildi.