İİM Esirtki qylmysyna qarsy is-qımyl basqarmasynyń mamandary stýdentter men oqýshylardy saq bolýǵa shaqyrady, dep habarlaıdy almaty-akshamy.kz Polisia.kz silteme jasap.
Stýdentter arasynda júrgizilgen saýalnamalar olardyń esirtki qylmysy úshin beriletin jazadan habarsyz ekenin kórsetti. Mysaly, mefedron sıaqty sıntetıkalyq esirtkiniń 1,5 gramyn satqany úshin 7 jyldan 15 jylǵa deıin bas bostandyǵynan aıyrý jazasy taǵaıyndalady.
Polısıa jataqhanalarda reıdter uıymdastyrdy.
Birinshiden, jataqhanalarda turatyn stýdentterge kez kelgen psıhoaktıvti zattardy qoldanýdyń saldary, sondaı-aq esirtki satýǵa qatysqany úshin jaza týraly eskertiledi.
Ekinshiden, reıd barysynda kınologtar jataqhanalarda esirtkiniń bar-joǵyn tekseredi. Bir apta ishinde elimizdiń ártúrli óńirinde esirtkiniń qoldanylýyn nemese taralýyn anyqtaý jáne esirtki qylmysy úshin jaýapkershilikti túsindirý úshin kolejder men joǵary oqý oryndarynyń jataqhanalarynda qyzmettik-izdestirý ıtterin paıdalana otyryp, osyndaı 25 reıd ótkizilgen.
Stýdentter men jasóspirimder esirtki dılerlerine tez aldanady. Olar táýelsiz ómirdi bastap, bos ýaqytynda aqsha tabýǵa tarysady. Alaıda jastar kez kelgen zańsyz áreketke jaza qarastyrylǵanyn bilmeıdi. İshki ister mınıstrliginiń mindeti – árbir oqýshy men stýdentke osyndaı tabystyń saldary týraly eskertý. 16 jastan bastap esirtki qylmysy úshin zań aldynda jaýap berýge týra keledi, – dedi İİM Esirtki qylmysyna qarsy is-qımyl departamenti basshysynyń orynbasary Baqytjan Ámirhanov.
Onyń aıtýynsha, esirtki jasyrýshylar nemese kýrerler 7 jyldan 15 jylǵa deıingi merzimge bas bostandyǵynan aıyrý jazasyn alady.
Internette esirtkini jarnamalaý, nasıhattaý, belgili bir esirtki týraly forýmdarda oń pikirler úshin 3 jyldan 6 jylǵa deıin bas bostandyǵynan aıyrý jazasy qarastyrylǵan, – dedi İİM ókili.