Almatyda Medısınalyq saqtandyrý qorymen jasalǵan kelisim aıasynda segiz medısınalyq uıym ekstrakorporaldy uryqtandyrýdy iske asyrýda.
Almaty qalasynyń áleýmettik medısınalyq saqtandyrý qorynyń dırektory Tileýhan Ábildaev Óńirlik komýnıkasıalar qyzmetiniń brıfıńinde qaladaǵy medısınalyq saqtandyrý týraly aıtty, dep habarlaıdy Almaty-akshamy.kz
Onyń aıtýynsha, pandemıaǵa baılanysty qıyn jaǵdaılarǵa qaramastan, mindetti medısınalyq saqtandyrýdy engizý nátıjeleri medısınalyq saqtandyrý júıesiniń tolyq jumys istep turǵanyn kórsetedi, al qalanyń densaýlyq saqtaý búdjeti aıtarlyqtaı ósti.
Tileýhan Ábildaevtyń aıtýynsha, bıyl MÁMS búdjeti 246,6 mlrd teńgeni, onyń ishinde MÁMS-ǵa 158,3 mlrd teńgeni, MÁMS júıesinde 88,3 mlrd teńgeni quraıdy.
«Birinshi jartyjyldyqtyń qorytyndysy boıynsha, Áleýmettik medısınalyq saqtandyrý qory MÁMS paketinde Almaty qalasynda medısınalyq kómekke aqy tóleýge shamamen 53,6 mlrd teńge bóldi. Shyǵyndardyń kóp bóligi stasıonarlyq medısınalyq kómekke tólendi, bul 27,9 mlrd teńgeden asady», - dedi Tileýhan Ábildaev.
Ótken jylmen salystyrǵanda, joǵary tehnologıalyq operasıalardy qarjylandyrý 2,1 mlrd teńgege artty. Eger 2020 jyly 11,8 mlrd teńge bólinse, bıyl bul soma 13,9 mlrd teńgeni qurady. Aǵymdaǵy jyldyń 6 aıynda halyqqa joǵary tehnologıalyq qyzmet kórsetýge 8,2 mlrd astam teńge bólindi.
Almaty áleýmettik medısınalyq saqtandyrý qorynyń dırektory qymbat EKU prosedýrasyna baılanysty mysaldar keltirdi.
«Eger 2020 jyly 563 mıllıon teńge somasynda 643 EKU manıpýlásıasy júrgizilse, onda bıyl 3 245 qyzmetke 3,1 mıllıard teńge bólindi. 5 ese ósý baıqalady. Bıyl 1,1 mlrd teńge somasyna EKU-nyń 1173 prosedýrasy júrgizildi», - dedi Qor dırektory.
MÁMS kardıohırýrgıaǵa muqtaj naýqastarǵa úlken qoldaý kórsetýde. Bıyl joǵary tehnologıany qoldana otyryp, 3,2 mlrd teńge somasynda 837 qyzmet kórsetildi. Taǵy 2,4 mlrd teńge kúndizgi stasıonarlyq qyzmetke aqy tóleýge jumsalady.
«Mindetti áleýmettik medısınalyq saqtandyrý júıesin engizý medısınalyq ońaltýdy qarjylandyrýdy ulǵaıtýǵa jáne onyń qoljetimdiligin aıtarlyqtaı arttyrýǵa múmkindik berdi», - dedi Tileýhan Ábildaev.
Bıyl ońaltý qyzmetine 7,7 mlrd teńge bólindi, bul ótken jylmen salystyrǵanda eki ese kóp. Salystyrý úshin, Qor dırektory 2019 jyly ońaltý sharalaryna tek 0,6 mıllıard teńge jumsalǵanyn eske saldy. Onyń aıtýynsha, búginde 62 emhana ońaltý qyzmetin kórsetedi, buryn tek tórteýi ǵana bolǵan. Jyl basynan beri almatylyqtardy ońaltý kómegine 3,8 mlrd bólingen.