Almaty telearnasy ujymy óz kórermenin taǵy bir jańa týyndymen qýantpaq. Búginnen bastap «Medeýde kezdeseıik» atty telehıkaıa kópshilik nazaryna usynylady, dep habarlaıdy Almaty-akshamy.kz Almaty.tv-ge silteme jasap.
Serıal almatylyqtar men qala qonaqtarynyń taptyrmas demalys ortalyǵyna aınalǵan Medeý muz aıdynynyń 50 jyldyq mereıtoıyna arnalady. Jastar arasyndaǵy mahabbat pen dostyq qarym-qatynas baıandalatyn telehıkaıa melodrama janrynda túsirilgen.
Medeý muz aıdyny - talaı jasty tanystyryp, tabystyrǵan romantıkalyq meken. Telehıkaıa jelisi de osy sport nysanynan bastalady. Bokstan álem chempıony, sportshy Azat jattyǵý jasaý úshin Medeýge jıi barady. Al 20 jastaǵy Sara sol keshende jumys isteıdi. Merekelik is-sharaǵa daıyndyq kezinde olar tanysyp, aralasa bastaıdy. Ekeýara dostyq keıinnen mahabbatqa ulasady.
«Bul personajym basqalarǵa qaraǵanda erekshe. Óıtkeni buǵan deıingi keıipkerlerim kóp sóıleıtin, minezi unaı bermeıtin.Al bul keıipkerim salmaqty, sabyrly boldy. Men eń kóp jylaıtyn serıal desem bolady. Bizdiń top sizderge jaqsy dúnıe túsirý úshin tyrystyq. Baǵasyn ózderińiz bere jatarsyzdar», – dedi aktrısa Gúlıa Uzaqbaeva.
Telehıkaıadaǵy akterlik quram da kásibı jasaqtalǵan. Prodúserdiń sózinshe, senarı jelisine sáıkes keletin akter tabý ońaıǵa soqpaǵan. Kastıng eki aı júrgizilipti. Dýlyǵa Aqmolda, Aıgerim Jańalbaeva sekildi tanymal akterlermen birge serıalda Asqar Jumabekov, Gúlıa Uzaqbaeva, Nursulý İzbasarova sıaqty jas talanttar da boı kórsetedi.
«Túsirilim kezinde qıynshylyqtar kóp boldy. Kún sýytyp ketti. Medeýde ádemi kadrlar alaıyq desek, tuman túsip ketedi. Odan keıin jóndeý jumystary, Shymbulaqtaǵy fýnıkýler toqtap qalady. Bul serıalda Almatyny jańa qyrynan kóresizder, dronmen túsirilimder kóp boldy», – dedi telehıkaıa prodúseri Aı-Kerim Samalbekqyzy.
Telehıkaıa - Almaty telearnasynyń tól ónimi. Búgin saǵat 21:00-de serıaldyń eki birdeı bólimi kórsetiledi. Mahabbat dastanyn dúısenbi men juma aralyǵynda arnamyzdan tamashalaı alasyzdar.