500 adam qabyldaıtyn jańa zamanaýı emhanany salý josparlanýda.
Sanaýly kún qalǵan 2022 jyldyń sońyna deıin Medeý aýdanynyń turǵyndaryna kúnine 120 kelýshige arnalǵan jańa otbasylyq-dárigerlik ambýlatorıa paıdalanýǵa beriledi. Bul týraly aýdan halqymen kezdesý barysynda qala ákimi Erbolat Dosaev aıtty, dep habarlaıdy Almaty-akshamy.kz.
"Kólsaı" jáne "Sulýsaı" shaǵynaýdandarynda halyqqa medısınalyq kómektiń «qadamdyq qoljetimdiligin» qamtamasyz etý úshin jyldyń sońyna deıin demeýshilik qarajat esebinen feldsherlik-ambýlatorıalyq pýnktter ashý josparlanýda. "Alataý" shaǵynaýdanyndaǵy memlekettik aýrýhananyń aýmaǵynda modýldik kompúterlik tomografıa ortalyǵy salynýda. Obekt osy jyldyń sońyna deıin paıdalanýǵa beriledi. Budan basqa, aýrýhana ǵımaratyn qaıta jańartýǵa jobalaý-smetalyq qujattama ázirlenýde (jobalaý-smetalyq qujattamany aıaqtaý – 2023 jylǵy III toqsan)», - dedi qala jetekshisi.
Onyń aıtýynsha, №4 jáne №10 jedel járdem podstansıalarynyń jańa ǵımarattaryn salýǵa jobalaý-smetalyq qujattama ázirlenýde. Jobalaý-smetalyq qujattama 2023 jyldyń 4-shi toqsanynda aıaqtalady.
"Dýman" shaǵynaýdanynda bir aýysymda 500 adam qabyldaıtyn jańa zamanaýı emhanany salý josparlanýda. Qazirgi ýaqytta jobalaý-smetalyq qujattama ázirlenýde, aıaqtalý merzimi – 2023 jyldyń 4-shi toqsany. 2023-2024 jyldary qala ákimdigi «Shyǵys qaqpasy» polıortalyǵynyń aýmaǵynda 2 aýqymdy jobany iske asyrý josparlanǵan. Bular - onkologıalyq ortalyǵy bar 250 tósektik kópbeıindi aýrýhana men Buqtyrma kóshesi boıynda SPID ortalyǵy bar 250 tósektik pallıatıvtik kómek ortalyǵynyń qurylysy», - dedi Erbolat Dosaev.