Máýlen Áshimbaev Valentına Matvıenkomen kezdesti
Qazaqstan Parlamenti Senatynyń Tóraǵasy Máýlen Áshimbaev elimizge resmı saparmen kelgen Reseı Federaldy Jınalysy Federasıa Keńesiniń Tóraıymy Valentına Matvıenkomen kezdesti, dep habarlady Almaty-akshamy.kz QR Parlament Senaty taratqan habarǵa silteme jasap.
Kezdesýdi ashqan Máýlen Áshimbaev eki eldiń arasyndaǵy qarym-qatynas tolyǵymen HHİ ǵasyrdaǵy tatý kórshilik jáne odaqtastyq týraly sharttyń qaǵıdalaryna sáıkes damyp kele jatqanyn atap ótti.
«Ótken jyldar ishinde qos eldiń arasynda strategıalyq seriktestiktiń berik irgetasy qalandy. Buǵan, eń aldymen, Qazaqstan Prezıdenti Qasym-Jomart Kemeluly Toqaev pen Reseı Prezıdenti Vladımır Vladımırovıch Pýtınniń jeke dostyq jáne ózara senimge negizdelgen qatynasy zor yqpalyn tıgizýde. Memleketaralyq baılanysty nyǵaıtýǵa Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev ta basa mán berip keledi», – dedi Máýlen Áshimbaev.
Senat ǵımaratynda ótken kezdesýde suhbattasýshylar ekijaqty yntymaqtastyqty odan ári tereńdetýge qatysty mańyzdy máselelerdi keńinen talqylady.
Óz sózinde Valentına Matvıenko eki el arasynda parlamentaralyq yntymaqtastyqtyń joǵary deńgeıde damyp kele jatqanyna nazar aýdardy.
«Elderimizdiń parlamentaralyq yntymaqtastyǵyn nyǵaıtýǵa basa mán berip kelemiz. Oǵan halyqaralyq parlamenttik alańdarda, onyń ishinde Parlamentaralyq assambleıalardaǵy ózara tıimdi is-qımylymyz dálel. Osy rette Qazaqstan delegasıasynyń Parlamentaralyq assambleıalar quramyndaǵy tıimdi jumysyn erekshe atap ótken jón. Qazaqstandyq sarapshylar modeldik zań jobalaryn ázirleýge, monıtorıń mısıasyna jáne TMD Parlamentaralyq assambleıasy komısıasynyń jumysyna belsendi qatysyp keledi», – dedi Valentına Matvıenko.
Sonymen qatar is-shara barysynda Qazaqstan men Reseıdiń kópjosparly qarym-qatynasyn zańnamalyq turǵydan qoldaýdyń mańyzdy ekeni aıtyldy. Odan bólek, taraptar pandemıamen kúres kezinde eki elde qabyldanǵan sharalarǵa toqtalyp ótti. Sondaı-aq, saýda-ekonomıkalyq, mádenı-gýmanıtarlyq jáne taǵy basqa salalar boıynsha baılanysty arttyrý máseleleri sóz boldy.
Kezdesýde parlamentaralyq yntymaqtastyqty nyǵaıtý máselesine erekshe ekpin berildi. Máýlen Áshimbaev ekologıa, sıfrlyq damý, ǵylym jáne taǵy basqa baǵyttar boıynsha birlesken sharalardy talqylaý jáne iske asyrý úshin Palatalar arasyndaǵy ózara is-qımyldy arttyrýdy usyndy.
«Biz parlamentaralyq yntymaqtastyǵymyzdy naqty ister arqyly damytýǵa daıynbyz. Sapar aıasynda kóteriletin máselelerdiń bári eki eldiń baılanysyn arttyrý úshin asa mańyzdy», – dedi Senat Tóraǵasy.
Máýlen Áshimbaev Qazaqstan Senaty agroónerkásip keshenin órkendetýdi zańnamalyq turǵydan qamtamasyz etý máselesinde de tájirıbe almasýǵa múddeli ekenin jetkizdi. Onyń aıtýynsha, elimizdiń ekonomıkalyq damýynda agroónerkásiptik keshenniń áleýeti zor. Sondyqtan qazaqstandyq senatorlar bul salaǵa basymdyq berip otyr.
Sondaı-aq Senat Spıkeri bilim jáne ǵylym salasyn jetildirýdi zańnamalyq qoldaýda birlesip jumys isteýdiń ózara tıimdi ekenin tilge tıek etti.
«Qazirgi tańda ǵylym ekonomıkalyq ósim men memleket damýynyń negizgi faktorlarynyń birine aınalyp otyr. Ǵylymı zertteýlerdiń qoldanbaly nátıjesin arttyrý mańyzdy mindet bolyp sanalady. Soǵan baılanysty Qazaqstan Senaty "Ǵylym týraly" zańǵa ózgerister engizý jáne normalardy jetildirý úshin jumys júrgizýde. Osy máselede salalyq komıtet depýtattarynyń reseılik áriptesterimen ózara tájirıbe almasýynyń mańyzy zor», – dedi Máýlen Áshimbaev.
Senat Tóaraǵasy osy maqsatpen tıisti komıtetterdiń birlesken onlaın-otyrystaryn uıymdastyrýdy jáne saraptamalyq-taldamalyq salada tájirıbe almasýdy júıeli jolǵa qoıýdyń bereri mol ekenin de atap ótti.
Aıta keteıik, erteń Reseı depýtattarynyń resmı sapary aıasynda Qazaqstan Parlamenti Senaty men Reseı Federaldy Jınalysynyń Federasıa Keńesi arasyndaǵy Yntymaqtastyq jónindegi komısıanyń 16-shy otyrysy ótedi dep josparlanyp otyr.