Máýlen Áshimbaev senatorlardy Jańa Qazaqstan ıdeıasyn iske asyrýǵa belsendi atsalysýǵa shaqyrdy
QR Parlament Senatynyń tóraǵasy Máýlen Áshimbaev áriptesterin Jańa Qazaqstan ıdeıasyn iske asyrýǵa belsendi atsalysýǵa shaqyrdy, dep habarlaıdy Almaty-akshamy.kz
«Memleket basshysy elimizdiń saıası júıesin odan ári demokratıalandyrý qajettigine basa mán berdi. Jalpy, Prezıdentimiz usynǵan sharalar júıeli sıpatqa ıe. Olar memlekettik basqarý júıesin, ekonomıkanyń qurylymyn, áleýmettik salany keshendi ózgertýge arnalǵan. Sonymen qatar azamattarymyzdyń ómir súrý sapasyn arttyrýdy kózdeıdi. Osylaısha elimiz damýdyń jańa kezeńine aıaq basyp otyr. Bul tutas memlekettik basqarý júıesin merıtokratıa, ádilettilik jáne ashyqtyq qaǵıdalarynyń negizinde qaıta qurý kezeńi», - dedi Senat tóraǵasy.
Onyń aıtýynsha, osy jolda Parlament Senaty Memleket basshysynyń barlyq bastamasyn qoldaı otyryp, olardy zańnamalyq turǵydan qamtamasyz etý úshin qajetti jumystardy sapaly ári ýaqtyly júzege asyrýǵa tıis.
«Qurmetti depýtattar! Aldymyzda aýqymdy mindetter tur. Qazir halyq bizden naqty jumys pen nátıje kútip otyr. Sondyqtan eldiń senimi men úmitin aqtaý úshin aıanbaı eńbek eteıik. Osy jolda bárimiz belsendilik tanytyp, Prezıdentimiz aıtqandaı, Jańa Qazaqstandy birge quraıyq», - dedi Máýlen Áshimbaev Senattyń otyrysynda.